Ninim khan Dr. R. Lalthangliana, Hon’ble Minister, Higher & Technical Education etc. chuan Govt. Serchhip College a tlawh a, zirlaite nena inkawmhona neiin Mizorama mi langsar ni tura inzirchhuak ngei turin zirlaite a chah.

Minister chuan khawi hmunah pawh awm ila kan ngaihtuahna hniam lo se, eng hna pawh thawk thei tura thiamna nei tuma lehkha zir turin zirlaite a chah a. Khawvel hi cho loh ena en bik mai lovin, engpawh ka ti ve thei ani tih rilru pu a, huaisen taka awm turin a chah. Zirtirtute pawhin zirlaite harsatna beidawn pui mai lova, an theihna phu tawk zela dawm kang thiam tura theihtawp chhuahpui thin turin a chah a ni. Dr. R. Lalthangliana chuan, Serchhip College hi Mizoramah a tha ber kan ni thei a ni tih rilru pu theuh turin a chah a. Tunlaiah hunawl kan nghah tawh a, kan hunawlte hmang tangkai a, Mizorama mi langsar ni ngei thei tura zirnaa hun pe tam turin zirlaite leh zirtirtute a chah a ni.

College Infrastructure ah pawh a theih anga hmalak chhunzawm zel anih tur thu sawiin, RUSA atangin building sak belh nan Rs. Vaibelchhe 2 vel pek an nih tur thu a sawi a. Asst. Professor indaihlohna pawh sawrkarin a hriatpui a, a theih anga ngaihtuah sak zel an nih tur thu a sawi. Serchhip District chu zirna kawngah district dangte aiia sangah kan awm thin a, chutah chuan lungawi mai lovin zirlaite chu eng nge an nih chhunzawm zel tih hi a pawimawh a ni, a ti a ni.

Minister hi Pu Vanlalzawma, Ex- MP, Dr. R. Zarzosanga, IAS, Director, Higher & Technical Education, Dr. Eric Zomawia, Mission Director, National Health Mission leh mipawimawh dang ten an tawiawm a ni.

He hun hi Pu PC Lalremsiama, Principal Govt. Serchhip College chuan a kaihruai a, Minister in an College a tlawh chu lawmawm a tih thu sawiin, College in harsatna an neih hrang hrangte a lo thlen a ni. Govt. Serchhip College hi 1973 a din niin, tunah hian Subject hrang hrang 13 zir theihna hawn mek a ni a. Zirlai 375 awmin, zirtirtu 47 leh thawktu dang 14 an awm mek a ni.