2825/2022-2023 
Hnahthial the 28th November, 2022 - November ni 14 tlaia Maudarh khuaa ABCI Lung lakna hmun (Quarry) chim chu tukin khan H&FW Minister Dr R. Lalthangliana chuan a hmunah a tlawh a ni.

Minister hi Lunglei East bialtu MLA & Lunglei HPC Vice Chairman Pu Lawmawma Tochhawng, Hnahthial SP Pu Vineet Kumar te bakah NHIDCL leh ABCI thawktute, sawrkar official-te leh media mi ten an tawiawm a ni.

Dr R. Lalthangliana chuan Maudarh quarry chim avanga chhiatna rapthlak tak thleng avanga mi 12 laiin nunna an chan chu pawi a tih thu sawiin chhiatna avanga thite a tawrhpui thu leh lusun chhungte a tawrhpui takzet thu a sawi a. Maudarh quarry chu Mizoram chhimlam kawng siam mek atana lung tha lakna source pawimawh tak ani tih sawrkarin a hriatpui thu sawiin ram leilung mila fimkhur zawka hnathawh anih theihnan Geology & Mining Department mithiamte thurawn angin hmalakna kalpui anih tur thu a sawi a. Chhiat tawhna hmun zir chiangtu Geology & Mining Department Geologist te report pawh sawrkarah thehluh anih tawh thu leh hmalak zel dan tur chipchiar zawka enfiah turin Director, Geology & Mining hovin Department thawktute an rawn kal leh tur thu pawh a sawi a. He chhiatna thleng avanga chhanchhuahna leh a tul ang thawktu Hnahthial leh Lunglei District officialte, Quick Response Team, SDRF, NDRF, khawtlang hruaitu, tlawmngai pawlte leh mimal te thawhrimna leh inpekna avangin an chungah lawmthu a sawi bawk a ni.

Maudarh Stone Quarry, Leite ram, Hnahthial District chu Ni 14.11.2022 tlai lamah khan a chim thut a, ABCI Infra Pvt Ltd hnuaia thawk GP Project leh ABCI Infra Pvt Ltd hnathawktu mi 12 lai chu lei min hian a delh a. He stone quarry hi C.Lalremruata s/o C. Lalneihthanga, Leite hminga 5.3.2020 khan Mining Permit pek a ni a, NHIDCL hnuaia Contractor ABCI Infra Pvt Ltd NH-54 166.00 km to 208 km ( Package 4) kawng siamtu nen inremna (agreement) siamin ni 31.08.2020 thleng a nunga, an dil angin Mining permit hi ni 31.7.2023 thleng extend a ni a.

He quarry chim tuk 15.11.2022 khan Lunglei check gate duty Remlalruata Msc (Geology) a hmunah kal nghalin report a pe a. 16-17.11.202 khan Directorate atangin Malsawmzuala, Geologist Junior leh Malsawmdawngliana, Geologist Junior te chu quarry chimna hmunah hian an kal bawk a ni.

Tun dinhmunah quarry license hi 17.11.2022 atang khan chawlh lailawk tir (suspend) rih a ni a. Mitthi ruang la hmuhloh pakhat Mr.Jahidul Islam (27) s/o Samsul Haque Assam zawn hna chu la chhunzawm mek a ni.