264/2023-2024

Champhai, the 29th April, 2023: Health & Family Welfare, Higher & Technical Education leh Commerce & Industries Department changtu Minister Dr. R.Lalthangliana chuan tukin khan Vaphai, Samthang leh Khawbung khuate tlawhin, khawtlang hruaitute leh Official-te kawmna hun a hmang. Minister hi East Tuipui bialtu MLA Pu Ramthanmawia, Vice Chairman, Bamboo Link Road Board, H&FW Department Principal Director Dr. PC Lalramliana, Director of Health Services Dr. Vanlalsawma, Mission Director NHM Dr. Eric Zomawia leh Official dangte'n an tawiawm a ni.

Dr. R. Lalthangliana chuan hripui leng avangin hun engemawchen hmasawnna hna thawh a khaihlak thu sawiin, damkhawchhuah theih nana hripui do kawnga thahnemngai taka Sawrkar tawiawm thintu mipui, khawtlang, NGO leh Kohhrante chungah lawmthu a sawi a. Hripui leng chung pawhin Sawrkarin mipui hmakhua ngaia hmasawnna a theih ang anga a kalpui thu leh, a rah chhuahte hmuh chhoh zel a ni chu lawmawm a ti a. East Tuipui huamchhungah pawh hmasawnna hrang hrangte siam a nih thu leh health infrastructure-te pawh tihchangtlun zel a nih thu a sawi a. Bungzung PHC leh Farkawn PHC Building tharte nimin lamah hawn a nih thu tarlangin, cheng nuai 348 sengin Sesih PHC Building sak thuai tum a ni a, Khawbung PHC sakthat nan pawh cheng nuai 419 proposal siam a ni, a ti a. Khawbung Market sak nana hmalakna awm mek belhchhah nan hmalak zui a nih tur thu sawiin, khawtlang mipuite chu nakin zela hak zauhna tur hre chunga department ramte humhalh tlat turin a chah a ni. 

Kalkhawmte chu ngaihtuahna ngelnghet tak nei tur leh, thuthang nazawngte finfiah hmasa lova awih mai lo turtein a fuih a. Hmun danga la awm ngailo nau nei turte awm lailawkna Birth Waiting Hall, Vaphai Health & Wellness Centre-a ruahman a ni chu fakawm a tih thu a sawi a. World Bank fund cheng vaibelchhe 280 hmangin Hospital cheithat leh thuamthat kawnga hmalak mek zel a nih thu a sawi a. Health Sub-Centre te Health & Wellness Centre-ah hlankai an nih thu sawiin, heng zinga 34 velah Ayush Doctor dah a ni a, adangahte BSc Nursing dah an nih thu a sawi bawk a. Sub-Centre awmlohna khua 235 ah Health Clinic dah a ni a, hmanraw mamawhte dah vek tum a ni, a ti bawk.

Health Minister chuan JICA nena tangdunin Zemabawkah cheng nuai 70,000 senna tur Cancer Superspeciality Hospital din tum a nih thu leh, kum 2028 ah zawhfel hman beisei a nih thu a sawi a. Champhai District mipuite chhawr theih turin tunhnaiah Champhai Urban PHC, rikrum thila damlo enkawlna Trauma Centre, RT-PCR Laboratory leh naupang ICU te hawn a nih thu sawiin, natna khirhkhan bikte uluk taka enkawlna Damdawiin, khum 50 awmna tur Critical Care Block, cheng nuai 2000 senga sak tum a nih thu a sawi a; hei hian Hospital Building mai nilo hmanraw tha leh changtlung zawk a kengtel dawn a ni, a ti bawk.

Commerce & Industries Minister ni bawk chuan Zokhawthar Land Custom Station tihchangtlun nan cheng nuai 1500 senga hmalak mek a nih thu a sawi a. Tunhnaia India rama Border Trade lian tham kalpuina tur hmun 25 thlan chhuah zingah Zokhawthar leh Zorinpui te a tel chu lawmawm a tih thu sawiin, Mizoram tana chhawrnahawm tak tur a ni, a ti bawk.  Bangladesh nena insumdawntawnna tihchangtlun nan Tlabung Kawrpuichhuahah cheng vaibelchhe 552.25 senga hmalak tum a nih thu a sawi a. Ramri insumdawntawnna tih changtlun nan Border Hut-te pawh Sawrkar laipui dawra hmalak chhunzawm zel a nih thu a sawi a. Zirna tihhmasawn kawnga Sawrkar hmalaknate tarlangin, sum leh pai dinhmunte thlir chungin zirna sang zawk leh changtlung zawk chhawpchhuah kawngah theihtawp chhuah zel tum a ni, a ti bawk.

East Tuipui bialtu MLA Pu Ramthanmawia, Bamboo Link Road Board Vice Chairman chuan khawtlang mamawh leh tul angte theihtawp chhuaha ngaihtuah thin a nih thu a sawi a. Inkalpawhna kawngpui, nitin mamawh ei leh bar, eirawngbawlna gas, kawlphetha, tui leh tul dangte chhawpchhuah kawngah Sawrkarin theihtawp a chhuah zel thu a sawi a. Hmasawnna ruhrel chhawpchhuah kawnga Sawrkar hmalaknate tawiawm tur leh tha taka thlawp tlat thin turin khawtlang mipuite a chah a ni. A bial chhunga Primary Health Centre (PHC) 4 zinga 2, Bungzung leh Farkawn PHC Building sak tharte hawnfel a ni ta chu lawmawm a tih thu sawiin, hriselna kawnga pawimawh tak hmunhma leh thawktute ngaihtuah kawnga Health Minister leh Department hotute duhsaknaah bial aiawhin lawmthu a sawi a. Bial chhung zirna tih hmasawn nana pawimawh tak tur, Khawbunga Eklavya Model Residential School (EMRS) sakna tur land lease buaipui mek a nih thu leh, a tira estimate aia tam zawk cheng vaibelchhe 48 estimate siama sak hna tan thuai tum a nih thu a sawi a. Awlsam zawka Aizawl pan nan Bungzung to Biate kawng laih tlang a nih hnuah, Zawlsei atanga Leng khaw kawng pawh tur pawh lai tlang leh tura ruahmanna neih a nih thu a sawi bawk.

Dr. R.Lalthangliana chuan khawtlang hmasawnna tura pawimawhte leh Sawrkar hmalaknate khawtlang hruaitute kawmin a sawipui a. Mamawh an thlente a tul anga enzui sak a tum thu a hrilh a ni.

Vaphai Health & Wellness Centre-a hun hman hi VCP Pu Thangngaihzuala'n kaihruaiin Pu MC Lalramenga'n inlawmna thu a sawi a. Samthang BNRGSK Hall-a hun hman hi VCP Pu C.Lalrintluanga'n kaihruaiin, Khawbung Zawlbuka inkawmhona hun hman hi VCP Pu C.Rokhuma'n a kaihruai a ni.