Sorkar Laipuiin Mizoram Larsap thar atana a ruat Dr. Smt. Kamla chu vawiin tlai dar 6 khan Raj Bhawan-ah rinawmna thutiam tira Mizoram Governor 12-na atan lakluh a ni a. Rinawmna thu hi Gauhati High Court, Judge Justice B. K. Sharma’n a tiam tir a ni.

Larsap thar lakluhna inkhawm-ah hian Chief Minister Pu Lal Thanhawla, Assembly Speaker Pu Hiphei, Minister-te, Parliamentary Secretary-te leh MLA te bakah Sorkar mi pawimawh thahnem tak an tel.

Larsap thar hi kum 87 a upa niin January ni 12, 1927 khan Gorir khua, Tehsil Kehtri, District Jhunjhunu, Rajasthan-ah a piang a. Zirna lamah chuan BA( Economics, Political Science & History) leh MA(History) a ni.

Kum 1954 khan kum 27 a upa a nih laiin Rajastan Sawrkar-a hmeichhe Minister hmasa ber ani a, hemi hnu hian Congress siam Rajasthan Sawrkar hrang hrang hnuaia Minister vawi engemawzat niin Home, Education, Agriculture leh Revenue Department te a lo enkawl tawh a ni. Kum 50 chuang politician hlun lo ni tawh Dr. Smt. Kamla hi Rajasthan Deputy Chief Minister pawh a lo ni tawh a ni.

Mizoram Governor thar Dr. Smt. Kamla hi October ni 15, 2009 atangin November ni 26, 2009 thleng khan Tripura Governor leh November ni 27, 2009 atangin July ni 6, 2014 thleng khan Gujarat Governor te a lo ni tawh bawk. October 2009 a Tripura Governor atan ruat a nih khan Hmarchhak state te tana hmeichhe Governor ruat hmasa ber a ni hial a ni.