North East Council (NEC) chuan kum thum kalta atanga a lo buatsaih thin tawh angin kumin pawh hian Hmarchhak huapa Football Tournament lar ber Dr. T. Ao Memorial Football Tournament chu a buatsaih leh dawn a. DoNER Minister leh NEC Chairman ni bawk Pu Pawan Ghatowar Singh chuan 4^th Dr. T. Ao Memorial Football Tournament chu November ni 15 atangin November ni 23 thleng Meghalaya khawpui Shillong ah buatsaih a nih tur thu a puang.  

He Tournament vawikhatna, vawihnihna leh vawithumna te chu Nagaland, Manipur leh Sikkimah te buatsaih niin 3^rd Dr. T. Ao Memorial Football Tournament a khan Mizoram an Champion a, Tournament vawikhatna leh vawihnihna ah chuan Manipur an Champion a ni.

Tournament-a pakhatna, pahnihna, pathum leh palina te hian lawmman pawisa fai Rs. 7,00,000/-, Rs. 4,00,000/-, Rs. 2,00,000/- leh Rs. 1,00,000/- theuh a keng tel dawn a. Hemi bakah hian lawmman chi hrang hrang – Fair Player (Rs. 50,000/-); League System a inkhelh a team chak lo (Rs. 50,000/- theuh); Player of the Tournament (Rs. 20,000/-); Highest Goal Scorer (Rs. 10,000/-); Best Goal Keeper (Rs. 10,000/-); Best Team Coach & Management (Rs. 20,000 ve ve) leh Runners-Up Team Coach & Management (Rs. 10,000 ve ve) te buatsaih a ni dawn  bawk.

 Dr. T. Ao Memorial Football Tournament hi kum 2009 atang khan kum tin Hmarchhak state thalai te tan NEC in a buatsaih thin a. Dr. Talimeran Ao (1918 – 1998) kha kum 1948 Olympics a India Football Team Captain niin kum 1943 leh 1952 inkarah Mohan Bagan AC tan a khel thin a. Football a ban san hnu in R G Kar Medical College Kolkata a MBBS zir leh in, doctor a ni a. Nagaland Sawrkar ah doctor hna thawk in, kum 1978 khan Nagaland Health Services Director-in a pension a ni.