3570/2024-2025

17th December, 2024 : College leh University-a Mizo subject zirtirtu pawl, Mizo Literature and Language Teachers'Academy (MILLTA) chu vawiin khan Govt. J. Thankima College-ah an inkhawmpui a. Higher & Technical Education Minister, Dr. Vanlalthlana'n khual lian niin a hmanpui.

MILLTA inkhawmpuiaha hian Dr. Vanlalthlana chuan College leh University-a Mizo zirtirtute chu Mizo Tawng humhalhtu, Mizo nihna (identity) vawng nungtu an nih avangin chhuanawm a tih thu a sawi a. Mizo subject-a zirtirtu, college-a post ruak awm te pawh a tul ang zela hnawhkhah tum a nih thu a sawi bawk.

Dr. Vanlalthlana chuan, Mizo \awng tihmasawn tura sorkar hmasain Mizo Language Development Board (MLDB) a lo din chu lawmawm a tih thu a sawi a. Tangkai zawka hman a nih theih nan a kalhmang tur te duan that mek a nih thu a sawi a, "MLDB hi |angkai taka hman kan tum a ni," a ti.

Khual lian chuan Mizo Tawng humhalh tur leh thangtharte hnena zirtir zel turin, milem bu (comics) hmanga hmalak chhoh tum a nih thu a sawi a. Tunah hian Samagra leh SCERT hnuaiah nundan tha inzirtirna (moral reform) bakah Mizo Tawng leh nihna zirtir thei chi comics siam chhoh zel tum a nih thu a sawi bawk. Ziahzawm leh ziah zawm loh chungchang te, Mizo Tawng humhalh chungchang te pawh la zir ho zel thaa a hriat thu a sawi.

MILLTA inkhawmpui hi an President, Prof. C. Vanlalhruaia chuan a kaihruai a, an pawl Adviser Prof. Laltluangliana Khiangte leh Govt. J. Thankima College Principal, Prof. J.V. Nunchunga te pawhin thu an sawi bawk.

MILLTA Secretary, Dr. H. Laldinmawia'report atanga a lan danin MILLTA-ah hian Mizoram College hrang hrang, Mizoram University leh ICFAI University te atangin member 119 an nei mek a. Heng zingah hian a ngheta thawk 65, a nghet lova thawk 54 an awm mek a ni. Vawiin inkhawmpuiah hian Aizawl College hrang hrang bakah Mamit, Kolasib, Zawlnuam, Lunglei, serchhip, Kamalanagar leh hmun dang atangin member te an kalkhawm a ni.

MILLTA hian chawhnu lamah "Mizo Drama Zir Chianna' tih thupui hmangin seminar an buatsaih nghal a. Mithiam hrang hrang 16 ten Mizo Lemchan zir chianna paper 13 lai zirhoa a ni a. Heng zirhona paper, lehkhabua siam leh MILLTA danpui leh member bu chu Khual lian, Dr. Vanlalthlana hian a tlangzarh a, MILLTA member, Superanuation-a pension ta pahnih, Dr. Darchuailova Renthlei, Govt. Hrangbana College leh Pu JC Zothansanga, Govt. Zawlnuam College te hnenah ngaihhruina thuziak chu khual lian hian a hlan bawk.

MILLTA hi kum 1988-a din a ni a, a tirah chuan Mizo Lecturer's Academy (MLA) tih a ni thin a, tunah erawh College leh University-a Mizo subject zirtirtu inzawmkhawmna a nih angin, Mizo Literature and Language Teachers'Academy tih hming an pu ta a ni.