No.3333/2020-2020

Hnahlan, the 22nd July, 2020 :  Vawiin khan Champhai North bialtu MLA, Mizoram Cooperative Development Council Vice-Chairman ni bawk Dr. ZR Thiamsanga chuan a bial chhung ami  Hnahlan Winery tlawhin, Hnahlan Grape Growers’ and Processing Cooperative Society ten an Winery a her tur kumin July thla bul atanga Grape chingtute hnen aṭanga grape an lei khawm quintal 200 vel her tan ni (Crushing Day) puala inkhawm buatsaih a hmanpui.

He crushing day hmanpuitu Dr. ZR Thiamsanga chuan grape chingtute thawhrah a tak ngeia a hmu chu vannei a intih thute, Hnahlan khua chu tun hma zawng a grape vanga hmingthang, rawih ral ta mai anga an sawi thin chu dawt a nih zia a hmun ngei a hmutu a nih thu a sawi a. India rama Grape ching tam ber khua an nih avangin Grape chingtute chu nasa zuala hma la a, grape huan tuaihnum turin a fuihin,  Mizoram sawrkarin grape a ngaih pawimawh thu sawiin, sawrkarin grape chingtute tihnual zawnga dan leh hrai duan a tum loh thu mipui kal khawm te a hrih bawk.

Dr. ZR Thiamsanga chuan tunhma a 'Zawlaidi' fortified wine ang siam lova, French technology hmanga Hnahlan Winery in wine quality tha tak a siam ve thei ta mai chu mak a tih thu sawiin, nasa lehzuala tan la a, hmasawn zel turin duhsakna a hlan bawk.

Hnahlan Winery hruaitute chuan Ministry of Food Processing Industries (MoFPI) hnuaia project siama Winery upgradation and modernization kalpui an duh thu bialtu MLA hi lo hrilhin, hemi tur hian MoFPI dan leh hraiin a phut anga Hnahlan leh a chhehvel chu grape producing region a sawrkarin a puan phawt a ngaih thu an sawi a. Dr. ZR Thiamsanga chuan Aizawl a thlen thlak veleh Chief Minister hnena an thu leh hla thlen sak a, a ṭul anga hmalak pui a tum thu Winery hruaitute a hrilh a ni.

He huna tel ve Champhai district bawrhsdap Pi Maria CT Zuali pawhin FOCUS hnuai ah Innovation programme kaltlangin Hnahlan Winery chawikanna tur awm theia a hriat thu leh a rang thei ang ber ama ho ngei a mithiamte nen endik tura Winery tlawh leh a tum thu a sawi bawk. 

Dr. ZR Thiamsanga hian Covid 19 vanga ramri a duty lai a boral Khuangphah VLTF member pakhat chu Rs. nuai 1 in a ral bawk a ni.