No.395/2020-2021

Mizoram sawrkarin Covid-19 chungchanga hmalakna leh dinhmunte zirchiang tura a din Covid-19 Medical Operational Team, Dr. ZR Thiamsanga, MLA, Vice Chairman, Health & Family Welfare Board kaihhruai chuan vawiin khan Champhai District Level Task Force on Covid-19 te meeting an neihpui a. Hemi hnu hian Indo-Myanmar Border Zokhawthar khua tlawhin Melbuk leh Zokhawthar VLTF te  kawmna hun neiin, an mamawh tur hmanruate an hlan a. Land Custom Station Quarantine Centre, Zokhawthar    tlawhin an enfiah nghal bawk a ni.  

Covid-19 Medical Operational Team Chairman Dr. ZR Thiamsanga chuan khawvel pum tibuai mektu Covid-19 hripui  beihlet kawngah Sawrkarin  theihtawpa hma a lak zel thu a sawi a. Ral hmatawnga ding thin hriselna lama thawktute, Police, Village Level Task Force-te,  phal taka tanpuina thawhtu mimal, pawl, Kohhran  bakah  PPE siamtu mithahnemngai tak takte chu chhuanawm a tih thu a sawi a. Sawrkar tha tichak tura mawhphurhna chelhtu hrang hrang District Level Task Force on Covid-19, Village Level Task Force, NGO, VC leh Media-te thahnemngaihna a fak a. Champhai district chu International Border-a  awm anih avangin Sawrkarin a ngaipawimawh a, ramri ven kawngah theihtawp chhuah chhunzawm zel a tul a, hemi tur hian kan zavaia thawhhona a ngai zel dawn a ni, a ti a. Mizoram sawrkarin pheikhai rual leh chak zawka Covid-19 beihlet anih theihna turin Medical Operation Team 4,  Indian Medical Association,  Mizoram Government Doctor Association leh Private lama thawkte awmkhawmna a din a, Mizoram  hmun hrang hrangte tlawh mekin, an dinhmunte zirchian mek anih thu leh zirchianna atangin Sawrkarah thurawn  thlen tura tih an nih thu a sawi a. Mizoram chuan Covid-19 dona kawngah khawtlai lovin hma a lak vat thu sawiin, India rampuma inkharkhip  puan hma ni 3 ah puan a ni a, Airport pawh a khar hmasa ber pawl kan ni, a ti a. Party anga inthliarna awm lova ram hruaitute leh department hrang hrang hotute, Village/Local Level Task Force, NGO, VC leh Media te'n mahni phaktawk theuhah  theihtawp an chhuah a, India rama lockdown kalpui tha ber kan ni hial a ni, a ti a. Mizoramah  inkhuahkhirhna tha tak vangin case pakhat kan nei  tih loh chu engmah kai chhawn a awm rih lo a, Sawrkarin hmanrua engemaw zat a neih tawh bakah a chah belh mek thu pawh a sawi a. Champhai district chhunga Covid-19 dona kawnga thawktute zawng zawngte  chungah bialtu MLA te’n thinlung taka lawmthu an sawi thu a tarlang bawk a ni. 

Champhai Bawrhsap Pu Mark Lalthanliana hnen atangin Champhai district chhunga Covid-19 dona kawnga  hmalakna hrang hrangte ngaihthlak a ni a. State Disaster Management Authority inkaihhruaina angin khawtinah VLTF din a ni a, an kalphungte   DLTF leh District administration in a vil reng thin thu a sawi a.  Inkharkhip  avanga chhuanchham awm theite mamawh hriain CM Relief Fund leh DM&R atangin  VLTF leh Home hnenah  tanpuina sumfai hlan mek zel a ni, a ti a.   Lockdown puan chhunzawm leh hnuah Ministry of Home Affairs-in inkaihhruaina a siam zulzuiin district chhunga dan zawm tur duan pawh Inrinni a enho anih hnuah Thawhtanni atanga hman tan tum anih thu a sawi a. Champhai District chhunga Government designated Quarantine Facilities 3 ah mi 6 dah mek an nih thu sawiin, State dang mi tangkhang mi 166 an awm mek thu a sawi bawk a ni. 

Champhai SP Pu Rex Zarzoliana Vanchhawng chuan Covid-19 Medical Operation Team te’n Champhai district an rawn tlawh vangin lawmthu a sawi a. Champhai district chhung ramri hrul hmun 28 ah  vengtu Police 85 an awm mek thu leh an thla khat tla tur ei leh in pek mai theiha ruahman a ni, a ti a. Ramri khar hnuah India ram rawn lutru mi 5 man an ni a,  Quarantine Centre a dahluh an nih thu leh mi  2 te thubuai siam sak niin, 3 dangte Quarantine huntiam  zawhah case siam sak ve leh tur an nih thu a sawi a. Dan lo anga ramri kante chu thubuai siam saka man zel tur an nih thu sawiin,  DLTF, VLTF, YMA leh Medical team-te inkara thawhhona tha tak awm chu a entawntlak hle a ni, a ti a. Champhai District chu ramri depa  awm anih avangin engtiklai mahin inthlahdah a thiang lo a, kan zavaia tan mar pat a ngai a ni, a ti bawk. 

CMO Champhai Dr. R.Lianmawia pawhin thusawiin, kumin February thla tir atangin Zokhawthar leh Khawkawnah Medical Screening kalpui tan niin, CMO hnuaiah  Team 11 din a ni a, PHC leh CHC ah te team din vek a ni a, CMO Champhai hnuaiah Isolation Bed PHC ah 2,  CHC ah 3 leh District Hospital ah 5 siam a ni, a ti a. Quarantine Facilities Centre pathumte Medical Team-in an vil thina,  indaihlohnate phuhruk nan khaw hrang hranga thawktute pawhkhawm an nih thu a sawi a. Undivided Champhai District-ah home quarantine 603 an awm tawh thu leh Covid Care Centre 2,  Tourist Lodge Zokhawthar leh Khawzawl District Hospital te,  Dedicated Covid Care Centre atan  District Hospital Champhai Surgical Block khum 20 awm theihna tur buatsaih a nih thu a sawi bawk. 

Pu RL Thianghlima, Principal DIET Champhai, Procurement Nodal Officer chuan Quarantine Centre kalpui mekah harsatna lian tham a awm loh thu a sawi a.  Pu Vanlalvuana Rokhum, SDHO, Nodal Officer, Vegetables Supply Chain chuan tundinhmunah  chawhmeh  intodelh anih thu leh  tualchhung mamawh bak zawngte Aizawl lamah thawn thlak thin a nih thu a sawi a. DCSO Champhai Pu Spencer Vanlalchhuanga'n buhfai dinhmun a that thu leh harsatna a awm rih loh thu a sawi a. Dr. Zatluanga, DMS Champhai chuan mipuite tan Damdawiin pan kher ngai lo a rawn mai theih tura Doctor number an pekchuah thu sawiin biakpawh reng theih an nih thu a sawi a. Mipuite chu loh theih loh thilte anih loh chuan damdawiin pan tam lo turin a ngen a. He hunah hian Medical Operational Team Member Dr.C.Lalsangzuala leh Dr. Lalrintluanga Jahau te'n zirtirna an pe bawk a ni. 

He hunah hian SYMA Champhai President Pu VL Chama Hnamte chuan Sub Hqtrs YMA Champhai hnuaiah Khuangthing leh Vaikhawtlang inkarah YMA duty post 62 awm mekin, thalai 300 rual vel zet te a inchhawka ramri venga riahluh tir tum anih thu a sawi a. Joint VC Chairman Pu K.Lalmawia leh MJA President Pu Lalhmingmawia Pachuau te pawhin ramri ven uluk angaih thu leh lungrual taka thawhhona awm chu fakin tun aia nasa lehzuala tanrual angaih thu an sawi bawk a ni. 

Dr. ZR Thiamsanga, MLA, Vice-Chairman, H&FW Board & Chairman, Covid-19 Medical Operational Team leh member dangte hian chuan   tukin zing khan Champhai Vengthlang, Vengthlang North, Kahrawt leh Vengsang Village Task Force te an duty-na hmunah an tlawh kual a,  District Hospital Champhai pawh tlawh nghalin Covid-19 do nana an hmalaknate  leh mamawhte an enfiah a, VLTF leh Hospital mamawh thlente chu a tul anga sawrkara thlen sak tum a ni.

Covid-19 Medical Operational Team hian naktuk April Ni 17, 2020 hian Hnahlan tlangdung an tlawh dawn a. Hnahlan PHC Medical Officer leh  VLTF-te   meeting an neihpui dawn a ni.