No.7559/2020-2021

Vawiin khan Health & Family Welfare Board Vice Chairman Dr. ZR Thiamsanga, Champhai North bialtu MLA ni bawk chuan Champhai tlawhin hmasawnna ruhrel siam mek hrang hrangte leh hmachhawpte a enfiah.

Dr. ZR Thiamsanga hian tukin khan Non-Lapsable Central Pool of Resources (NLCPR) sum cheng Vaibelchhe 19.88 hmanga Champhai Keilungliah Lui khuah hna thawh mek (Construction of Dam Reservoir and Development of Recreation Centra at Champhai) tlawhin hmalak tawh chin leh hmachhawpte a enfiah a. Hemi hnu hian Champhai New Market (CHANEM) Building-a Urban Primary Health Centre (UPHC) bunfel tur hmunhmate a tlawh a. Casualty, Nursing Station, Lab, Examination Room, MO Room, Ward, Dressing room leh a dangte awm theihna tur Official leh khawtlang hruaitute nen an enfiah a ni. CHANEM Ground Floor-a Sumo Stand siam dan tur leh UD&PA kaltlanga District Hospital Road Vengsang tihzauh dan turte a enfiah bawk a ni.

Champhai North bialtu MLA hian DC Conference ah Head of Office thenkhatte meeting a neihpui bawk a ni. Dr. ZR Thiamsanga hi Pi Maria C.T. Zuali DC, Pu Rex Zarzoliana Vanchhawng SP, Pu Lalzorama SE P&E, Dr. R. Lianmawia CMO, Pu George Lalthanngura DAO, Pu Vanlalchhuanliana DUDO, Pu R.L Peka DHO, Pi Esther Leihang DLAO leh Dr. Lallawmkima DIPRO te'n an tawiawm a ni.