1529/2023-2024

Champhai the 16^th August, 2023 – Vawiin khan MZP Hqrs Champhai buatsaihin Kahrawt Community Hall-ah Career Guidance Program hman a ni a. Champhai North bialtu MLA & Vice Chairman, H&FW Board Dr ZR Thiamsanga chuan khuallian niin a hmanpui.

Career Guidance Program-ah hian Class IX leh Class X zirlaite an tel a. Pu F. Lalrinmuana, President Sub Hqrs YMA Champhai, Pu Moses Lalfakawma Tlau, SDC Champhai, Ralte Zodingliana, Advocate leh Francis Lalmalsawma Sailo, Entrepreneur te Resource person an ni a. Civil service, law & judicial, entrepreneurship chungchang te bakah ruihhlo hlauhawmna chungchang an zirho a. Zawhna leh chhanna hun tha tak an hmang bawk a ni.

Career Guidance Program hawnna inkhawm Pu Lalhmangaihzuala, Financial Secretary, MZP Hqrs Champhai kaihhruaiah Dr ZR Thiamsanga chuan thu sawiin zirlaite hmakhua ngaia an tana inzirna hun tha tak buatsaihtu MZP Hqrs Champhai te chu fakawm tiin, an hmalakna chuan zirlaite leh nu leh pa te ti phur tharin khawtlangah pawh nghawng tha tak a neih ngei a rin thu a sawi a. A zirna zinkawng zawh chhoh dan te leh harsatna hrang hrang a hmachhawn dan chanchin te sawiin zirlaite chu anmahni in ring tawk tlat tur leh an tuang ti chhah a, harsatnate hmachhawn ngam tura lo inpuahchah lawk turin a chah a. Zirlaite chu ram leh hnam veina thinlung an neih chhoh ve a tul thu sawiin an thiamna leh an theihna te khawtlang hmasawnna atana hman tum zel turin a chah a. Mizo zirlaite thlavang hauh kawngah leh ram leh hnam humhalh kawngah MZP chu a hmatawngah awmin huaisen takin hma an la thin chu fakawm a tih takzet thu pawh sawiin khawtlang tana an hnathawh leh an inpekna avangin an chungah lawmthu a sawi bawk a ni.

Champhai North bialtu MLA Dr ZR.Thiamsanga hian nimin Hnahlan Volleyball Association buatsaihin Hnahlan Field-ah I-Day, 1 day tournament a hmanpui bawk a. He hunah hia Hnahlan a infiamna hmun tih changtlun a ngaih zia leh infiammite intuai thar lehzual a ngaih thu sawiin theih tawp chhuah a tum thu a sawi a ni.