Mamit July 31 Vawiin khan DC Conference Hall, Mamit-ah Pu Jacob Lalawmpuia, Addl DC/Electoral Registration Officer chuan  Draft Electoral Roll, 2018 tlangzarhna a nei.

Pu Jacob Lalawmpuia chuan Elections Officials te, Party hrang hrang aiawhte leh Tlawmngai pawl hrang hrangte chu Roll thianghlim leh felfai kan neihna turin kan pawimawh vek a ni a ti a. Roll-a inthun luh kawngah mite dinhmun hrethiam tak chunga fimkhur taka kan kalpui a tul hle a ni  tiin thawhhona tha tak kan neih chu chhunzawm zel a duhthu a sawi bawk.

Pu J. Miahlung, Election Officer chuan Election Commission of India duhdan anga Draft Electoral Roll a hun taka tarchhuah a ni chu a lawmawm hle a ni tiin tun tum Draft Roll tarchhuah takah hian hmundanga insawnte paih an nih avangin Draft Electoral Roll tarchhuah chu a kiam thu a sawi. Draft Electoral Roll, 2018 tarchhuah taka hming siamthat emaw, belh leh paih duhte tan mahni bialtu BLO hnenah form hmangin August Ni 21 thleng engtik lai pawha siam that theih reng a nih thu a sawi a ni.

Tun tum Draft Electoral Roll, 2018 tlangzarh takah hian Mamit District chhungah vote nei mi 64165 awmin Mipa 32615 niin Hmeichhia hi 31550 an ni. Draft Roll hnuhnung ber atanga Vote nei kiamna hi -0.01% a ni.

Vawiin Draft Electoral Roll, 2018 tarchhuah taka a landanin Mamit District chhunga Assembly Constituency pathumah hian Polling station 38 a awm a. 1-Hachhek Constituency (ST) chhungah hian Zamuang Polling Station chu vote nei tamna ber niin voters 1117 a awm a. Sotapa polling station-ah hian Voters 119 awmin a tlemna ber a ni. 2-Dampa (ST) ah hian W. Phaileng Dinthar veng I -ah Voters 945 awmin a tamna ber a ni a, Zopui polling station-ah hian voters 46 awmin a tlemna ber a ni thung a ni. 3-Mamit (ST) chhunga vote nei tamna ber hi Damparengpui niin voters 1044 a awm a,  Dilzawl Polling station chu Voters tlemna ber niin vote nei mi 161 an awm a ni. 

Draft Electoral Roll, 2018 tarchhuah tak hi Pu Jacob Lalawmpuia chuan Political Party hrang hrang aiawhte a copy a hlan nghal a ni.

Vawiin Draft Electoral Roll, 2018 tarchhuahna hunah hian Mamit District chhunga AERO-te, Mamit khawpui chhunga Political Party hrang hrang aiawhte, Tlawmngai Pawl aiawhte leh thutharthehdarhtute an tel a ni.