Vawiin chawhma khan Health & Family Welfare Minister Dr. R.Lalthangliana chu MFM School of Nursing (ANM) zirchhuak Capping and Lamp Lighting Ceremony ah Khuallian niin, hun a hmanpui a ni.

Khuallian Dr.R.Lalthangliana chuan Pathian rinchhan a kal Mission Foundation Movement (MFM) te hnathawh leh inpekna chu mimal ang pawha ropui a tih thu a sawi a. Nursing chu eizawnna zahawm tak leh ringtu te tan phei chuan Isua rawngbawlna chhawm nung zel tu te zing a mi an ni, a ti a. Nurse lukhum (cap) chuan Nurse te nunah hmun pawimawh tak a chang a, inpumkhatna a entir a, lamp lighting chuan mite tanpuitu, mite tana thlamuanna thlen tu, beiseina pe tu leh thiamna bik nei pho lanna a ni, a ti a. Sawrkar institution emaw mimal institution atanga Nurse pass chhuak te chu Mizoram pawnah leh ram dangah tumruhna nena thawk chhuak turin a fuih a, Mizo te ziaa bet tlawmngaihna leh mi harsa zawk te tanpui zel duhna thinglung chuan Mizo Nurse te chu khawi hmunah pawh fak leh doctor tam tak te pawhin damlo enkawl atan an duh bik thin a ni, a ti bawk a ni. MNM School of Nursing atanga zir mek leh zirchhuak te chu inpekna tak tak nena thawk zel turin duhsakna a hlan a ni.

MFM School of Nursing hi Mission Foundation Movement (MFM) hnuaia peng pakhat a ni a, Kum 2009 ah Indian Nursing Council (INC), Mizoram Nursing Council (MNC) te phalna leh hriatpuina a din a ni. Kum tin nurse zir turin mi 20 admit an ni thin a, vawiinah hian mi 19 hnenah Capping & Lamp Lighting neihpui a ni. A din tirh atangin mi 180 velin an zir chhuak tawh a ni. Academic Session hi October atanga September a ni a, Synod Hospital, Civil Hospital, Kulikawn Hospital ah te clinical exposure neih thin a nih bakah Urban posting Bawngkawn Sub Centre ah leh Rural posting Kolasib District ah neih a ni bawk a ni.