Vawiin khan I&PR Conference Hall-ah Mizoram Health Department leh UNODC tangkawp chuan damdawi hmansual chungchang inhrilhriatnate, a ven dan leh a enkawl zui chungchangah Medical Officer-te tan training a buatsaih a ni.

Nileng awha training hi Health Secretary Pi Esther Lalruatikimi’n a hawng a. UNODC atanga lokal mithiam Dr Suresh Kumar, International Expert in Drugs and HIV/AIDS chuan training a neihpui a ni. Hospital and Medical Education Director Dr Lalrinliana Sailo leh Health Services Director Dr K Ropari ten thuhma an sawi a ni.

Ruihhlo hmang sual, a bikin inchiu thinte hi midangte aiin a let 13 zetin an boral hma a. Kum tin inchiu avang hian mi 70,000 atanga 100,000 inkar thi ziah ang an ni. Kum 2010 chhung khan ruihhlo avangin khawvel pumah mi 99,000 - 253,000 vel an thi a, Mizoramah pawh thla 9 chhungin overdose 202 awmin heng zinga 19 te chuan nunna an chan a ni. Opioid overdose hi dan theih a ni a, an nunna chhan theih a ni bawk. Damdawi ruihtheihloh leh him, Naloxone hmangin overdose te nunna chhan theih a ni a. Naloxone hi WHO Model List of Essential Medicines-ah a telh niin damdawi in zawng zawng chuan kawl vek tura beisei an ni. Inchiu thin IDU (Injecting Drug Users) te hian HIV hrik an lo pai a nih phei chuan a pai velote aiin an overdose awlsam bik hle.

Ni khat awh training vawiina neih hi kumin July 16-a UNODC leh Health Department tangkawpin ‘Conference on emerging trends & problems in the field of Drug Abuse & HIV/AIDS in Mizoram’ an lo buatsaih tawh bawhzuina a ni a. Overdose Management Mizo tawnga ziak, poster engemawzat Aizawl leh District dang Hospital pariatah tar a ni tawh bawk.