1651/2026-2027

Serchhip, the 4^th August, 2026: Vawiin khan Serchhip DC Meeting Hall-ah Bawrhsap Pu Paul L. Khuma hovin Serchhip District Water & Sanitation Mission (DSWM) Meeting neih a ni a. DSWM Member Secretary, Sr. EE, PHED Pu Isaac Lalchhuanmawia leh  member dangte bakah Sailulak, Sialsir, Leng leh Chhuanthar Tlangnuam VC hruaitute an tel a ni.

Vawiin meeting-ah hian Serchhip District-in Swatch Bharat Mission (G) atanga Sanitation Vehicle (Bolero Pik-Up pahnih) an dawnte, Bawlhhlawh phurhna atana Green Herd SP ten an enkawlzui dan tur te; Bawlhhlawh chi li (4)-a thliar hranna kalpuina tura Pilot Village atana thlan thingtlang khaw 4 – Sailulak, Sialsir, Leng leh Chhuanthar Tlangnuam-ahtea hmalak zui dan turte; thingtlanga bawlhhlawh paih man (fee) pek dan chungchangte leh dan zawm tha lote hremna chungchangte pawh sawi ho a ni bawk. 

August ni 15, 2026 atangin Sailulak, Sialsir, Leng leh Chhuanthar Tlangnuam-ahtea hian Bawlhhlawh chi li (4)-a thliar hranna hi kalpui tan a ni dawn a; Distirct bawrhsap Pu Paul L. Khuma chuan ‘bawlhhlawh sawngbawl dan kalpui mek hi District hmalakna a ni satliah mai lo va, Supreme Court thupek anga India ram puma hmalakna a nih thu sawiin a hlenchhuah kawngah Village Council hruaitute chu an pawimawh hle dawn a ni’ a ti a. Khaw dangah pawh tih chhoh zel tur a nih thu sawiin khaw dangte tana entawntlak nih tum zel turin VC-te chu a fuih bawk.

Meeting zawhah hian SBM (G) atanga dawn Bolero Pikup pahnih (2) vailiamna hun DC tualzawlah neih niin, Serchhip Dsitrict-a khaw enkawlfai kawnga thawk tha, khaw 15-te hnenah Community Dustbin (bawlhhlawh bawm) 205 sem nghal a ni bawk.