2716/2022-2023
Kolasib dated 18th November 2022: Vawiin chawhma khan District Urban Development Office, Kolasib, Public Health Engineering Department, Kolasib WATSAN Division leh Sub-Headquarters YMA, Kolasib tangkawp a ‘Save Tuichhuahen Hnatlang’ chu Pu John LT Sanga, Deputy Commissioner, Kolasibin DC Office tualzawl atangin hnatlang a chhuak tur te a vailiam.

Pu John LT Sanga, Deputy Commissioner chuan hmasawn tur chuan hrisel a pawimawh a, hrisel tur chuan ei leh in thianghlim, taksa mamawh ang tawk kan neih a pawimawh thu sawiin chung zinga pawimawh ber chu tui thianghlim a nih thu a sawi. Kolasib khawpui tui lakna ber ‘Tuichhuahen lui’ thianghlim leh thianghlim loh chuan Kolasiba cheng mipuite hriselna nasa taka a nghawng thu tarlangin Deputy Commissioner chuan mahni tui tlan tithianghlim tur a hmalak chu mi tin mawhphurhna pawimawh tak a nih thu a sawi. Sawrkar leh YMA-te tangkawp a ‘Save Tuichhuahen Hnatlang’ buatsaih a ni chu lawmawm a tih thu sawiin midangte tan a faina kawng a kai harhtu leh hmasawnna thlentu ni ngei se a duh thu a sawi bawk a ni.

‘Save Tuichhuahen Hnatlang’ vailiamna hun hi Pu C.Lalmuan Puia, DUDO, Kolasibin a kaihruai a, Pu H.Lalsiamliana, Sr. EE, PHED leh Pu Lalnunmawia, Secretary, Sub-Headquarters YMA, Kolasib ten faina tur a hmalakna chu mi tin mawhphurhna a nih thu leh thawhhona tha nen lo chuan faina tluangtling a awm theih loh thu an sawi a. Kolasib khaw chhung a YMA Branch 22, CZS Higher Secondary School NSS leh NCC cadet telna ‘Save Tuichhuahen Hnatlang’ kalpui dan tur te ngaihthlak a ni. Vawiin hnatlang ah hian Tuichhuahen lui fintu, Kolasib khaw chhung a lui hrang hrangte tihfai hna thawh a ni.