Sawrkar chuan July 2, 2019 tlailama Durtlang Venga Basic Service to Urban Poor(BSUP) hnuaia insak Pathum chim chhan te chu kar hnih (2 weeks) chhunga  chhui chiang  turin Aizawl Bawrhsap Pu Vanlalngaihsaka , Aizawl District Magistrate ni bawk chu vawiin khan a ruat a. Aizawl Bawrhsap hian Magisterial Inquiry  atanga a thil chhuichhuah te chu Sawrkarah a thlehlut dawn a ni. 

July 2(Tlailam) khan  BSUP Complex, Durtlanga Building Block pathum chu a chim a. Vanduaithlak takin he in chimah hian mi 3 in nunna an chan a, cheng tam tak man bungrua a chhe tel bawk a ni. He chhiatna thleng avang hian July 3 Chawhma Dar 10 khan Chief Secretary kaihhruaina hnuaiah Inter-Departmental Committee(IDC) chu an thukhawm a.  IDC chuan Durtlang BSUP Complex a cheng te zawng zawng chu hmun him zawka hriat, Rangvamual leh Edenthar venga BSUP Complex-ah te sawn a rel nghal a. Tin, Durtlang BSUP Complex chhunga building pathum chim chhanah mawhphurtu an awm em tih leh heng building chim ta te sak danah thil him lo a awm em tih te chhui chiang turin Magisterial Inquiry din a rawt nghal bawk a ni.