Vawiin khan Forest Department a Aizawl Division hmalakna in  Durtlang, Durtlang Leitan, Bawngkawn leh Chaltlang Local Council leh YMA Branch theuh te thingphun leh bawlhhlawh thianfaiin an hnatlang a, Pu Lalrinmawia Ralte, Environment & Forest Minister chuan  heng hnatlangte hi a hmunah a enpui a, mi 80 chuang zet hnatlangah hian an thawk chhuak a ni.

Durtlang kham leh a chhehvela ram humhalh leh tih hmasawn nan heng veng Local Council leh YMA branch theuhten a theih ang anga hma an lakna chuan rah tha tak chhuah chho zela hma a sawnna ah lawmthu sawiin Pu Lalrinmawia Ralte chuan uluk taka an enkawl mek ramsa chi hrang hrang Saza, Sakhi, Sanghal, Zawng, Sakuh, Sanghar chi hrang hrang bakah sava chi hrang hrang awmte chu humhalh tlat a tul thu leh helai velah hian tumah ramhnuai leh a chhunga cheng ramsa te ti riral zawnga che lo tur leh kawngsir bawlhhlawh paih mai mai tawh lo turin mitin a ngen nghal a ni. Vawiin programme kaihruaitu Pu Rosiama Vanchhong, Add. PCCF leh pawl aiawh hruaituten thu tawi an sawi bawk a ni.

Kum 2013 June thla daih tawh khan Chief Minister Pu Lal Thanhawla’n Durtlang Leitan Community Hall ah he programme hi a lo hawng tawh a. Tunah hian a hlawhtlin chhoh zel nan Forest Minister bakah Forest department a thawkten theih tawp an chhuahpuina ah helai veng mite hian lawmthu an sawi.

A tir atanga tun thlenga hma lak tawhna tlangpui chu hengte hi a ni:-

1. Inkalpawhna (Foot Path) 4.5 Km laia thui siam a ni.

2. Thing chi hrang hrang tiak 2000 aia tam phun tawh a ni.

3. Henglai hmunah hian bawlhhlawh paih a nih loh nan Angle Iron Post leh Wiremess hmanga hung a ni.

4. Kangmei laka venhim nan kawng hrang hranga hmalak a niin ramsa te venghimtu (watcher) te rawih an ni a, heng mi rawihte hian chhunzan zawma an zui reng avangin a ram hmelhmang pawhin tunah chuan hma a sawnin hmuh a nuam tawh em em a ni.

Heng bakah hian Pi Hangi Lunglen Tlang Bawngkawn YMA humhalh pawh uluk taka ven leh enkawl a ni a, tunah chuan Local Council theuh leh YMA te hmalakna avangin a ngaw tha hle tawh a ni.