No.2165/2020-2020

Lockdown Order kenkawh leh bawhzuina kawnga duty tura tirhte hriselna ngaihven tura ngenna lehkha Home Secretary chuan Director General of Police, Mizoram leh District tin DC te hnenah a thawn.

COVID-19 hripui leng mek dona kawnga Mizoram Sawrkarin inkharkhipna thupek a chhuah te bawhzui leh kenkawh hna chu police te leh Local/Village Level Task Force volunteer ten ngawrh takin an thawk mek a. Amaherawhchu, vanduaithlak takin, tun hnaiah police leh VLTF/LLTF mi leh sa te zingah damlohna avanga nunna hial chan an awm ta zeuh zeuh hi Sawrkar chuan pawi a ti takzet a ni, Home Secretary chuan a ti.

Disaster Management & Rehabilitation Department chuan Circular dated 25.03.2020 (leh revised SOP dated 05,06.2020) hmangin VLTF/LLTF te tan inkaihhruaina Standard Operating Procedure for Village/Local Level Task Force a lo chhuah tawh a. Revised Standard Operating Procedure for Village/Local Level Task Force hnuaia para 28 ah chuan heti hian sawi a ni -

"LLTF/VLTF hminga duty tur chu hrisel tha pangngai ni thei hram sela. Tin, kum lama upa, a bikin kum 60 pel tawh te chu duty tur a chhuah tir loh nise."

He inkaihhruaina hi uluk taka lo kengkawh turin leh hriselna pan leh derthawng sa, natna benvawn nei te chu duty tura - a bik takin ramri-a duty tur phei chuan - tirh chhuah loh nise tiin Home Secretary chuan a chah a ni.

Chutiang bawkin, police duty turte pawh an hriselna azirin an duty-na tur siam rem ni se, ramri ven duty chu mi hrisel tha pangngai leh hriselna lama insawiselna nei lo te chauh in tir chhuak turin hriattir an ni a. Ramri-a duty laia damsamlohna nei te chu a rang thei ang bera damdawi lam mithiamte rawna, rang taka enkawl zui an nih theihna atan hma lo la turin Home Secretary chuan ngen bawk a ni.