2747/2022-2023

Champhai, the 21st November, 2022: Sawrkar laipui Ministry of Jal Shakti hnuaia Department of Drinking Water & Sanitation kaltlanga hmalakna hrang hrangte inhrilhhriatna hun buatsaih chu vawiin chawhnu dar 3 khan Champhai District Water & Sanitation Mission Member-te chuan an Chairman Pu James Lalrinchhana, District Bawrhsap hovin NIC Conference Hall, Champhai ațangin Video Conference kaltlangin an chhim.

Hmalaknate chiang zawka puanzar leh inhrilhhriatna zau zawk neih anih theih nan Video Conference hmanga inrawnkhawmna hi neih a ni a. He hunah hian Jal Jeevan Survekshan (JJS) 2023 leh Swachh Survekshan Grameen (SSG) 2023 te chiang zawka hmelhriatna leh sawizauna Sawrkar laipuia Ministry of Jal Shakti Department of Drinking Water and Sanitation lam hotuten an nei a. 'Har Ghar Jal' leh 'Innovation" hnuaia PM's Awards for Excellence in Public Administration dawng tur thlan dan turte sawiho a ni a. JJS-2023 leh SSG-2023 hmalakna kaltlanga October 2022 chhunga District tithate puan a ni bawk.

Jal Jeevan Survekshan 2023 Champions of Change kaltlanga in tin thlengpha tui connection pek tam kawnga inelnaah India rama district hrang hrangte chu category 5 ah then hran an ni a, in awm zat atanga tui connection pek luh zawh tawh tam zawng 0% leh 25% inkarte chu 1 Star Category, Aspirants tia vuah an ni a hemi hnuaiah hian district 117 an awm a. 25% atanga 50% zawh tawhte chu 2 Star Category, Performers tih niin, hemi hnuaiah hian district 206 an awm a. 50% atanga 75% thleng zo tawhte chu 3 Star Category, Achievers tih an ni a, hemi hnuaiah hian district 165 an awm a. 75% atanga 100% zo tawhte chu 4 Star Category, High Achievers tih ni ve lehin hemi hnuaiah hian district 122 an awm a, tui connection pe kim vek tawh (100%) te chu 5 Star Category, Front Runners tih an ni a, hemi hnuaiah hian district 122 an awm a ni.

Kumin October ni 1 thlenga hmalakna hrang hrangte endikna atangin Champhai District chuan mark 79.24 hmuin Achievers 3 Star Category hnuaia District 165 zingah pakhatna dinhmun a hauh a, Mamit District chu pahnihna niin mark 74.37 a hmu a ni. High Achievers 4 Star Category hnuaia District 122 zingah Kolasib District chu pakhatna niin mark 64.61 a hmu a, mark 64 hmuin Serchhip District chuan pahnihna dinhmun a hauh bawk a ni.

Jal Jeevan Mission (JJM) kalpui anih hnu hian thingtlanga chhungkaw vaibelchhe 7.25 te tui connection pek fel tawh a ni a, Swachh Bharat Mission Grameen hnuaiah thingtlang khua nuai 1.2 te ODF Plus a puan a ni tawh bawk. District Water and Sanitation Missions (DWSM), Deputy Commissioner Chairman-na hnuaia kalpui chuan Jal Jeevan Mission leh Swatchh Bharat Mission (Grameen) hnuaia hmalaknate hun bituk chhunga zawhfel anih theih nan theihtawp a chhuah mek zel a ni.

DWSM hian JJM hnuaia in tina tui pekna Functional Household Tap Connections (FHTC) leh tui tlan endikna Water Quality Surveillance-te,  Solid and Liquid Waste Management infrastructure-te kalpui anih dante a enfiah reng a. Tunhnai khan Jal Jeevan Survekshan-2023 leh Swachh Survekshan Grameen-2023 te chu hawn a ni a, hemi hnuaiah hian District hrang hrangte category hrang hrang-ah dah niin, a hlawhtling theih nan intihsiakna tha kalpui a ni.