2471/2022-2023
Dated Serchhip, the 28th October, 2022: Vawiin khan Government Lungpho High School in Golden Jubilee an tlin leh HSLC Exam Centre thar an nihna an lawmna chu Er. Lalrinawma, Dy. Speaker chuan khuallian niin a hmanpui.

School Building kianga Jubilee Lungphun khuallianin a hawn hnuin Lungpho Mualzawlah a lawmna inkhawm buatsaih a ni a. He hunah hian khuallian chuan, Government Lungpho High Schoolin Golden Jubilee a lawm thei hi ropui hle a, he dinhmun a thlen theihna tura bul lo tantute, he school a lo thawk tawh te leh tuna thawk mekte inpekna fakin, chawimawi an phu tak zet a ni, a ti. Mihringte chu kan piantirh atangin zirtir ngai kan ni a, zirna leh hriatnain mihring nun a ti nuamin a ti famkima, mitinin kan mamawh, kan hringnun bulthut chu zirna hi a ni. School chu thil kan zirna hmunpui ber leh pawimawh berte zing ami anih avangin kan tan a hlu em em a, zirna inte kan neih ang ang te hi kan hluta, kan duat pawh a tul hle a ni. He school atang hian mi puitling leh hlawhtling tak tak an chhuak teuh tawh tih pawh kan hria ang. Chuvang chuan khawtlang mipuiten kan khaw school leh an nih phungte kan ngaihven reng ang a, a nei tu kan ni tih kan hriat reng a pawi mawh tak meuh a ni a ti. Er. Lalrinawma chuan Lungpho High School sawrkarin HSLC Exam Centre thar atan min ruahman sak lehzel chu lawmawm a tih thu sawiin, School Education Department chungah Tuikum bial mipui aiawh in lawmthu ka sawi a ni, a ti. Exam Centre hmingtha tak a nih ngei theih nana tan la sauh sauh turin a bial mipuite a chah a ni.

He hunah hian Dr.H. Lalthangliana, Director of School Education pawhin Golden Jubilee Souvenir tlangzarhin thu sawina a nei a. Govt. Lungpho High School in Golden Jubilee an lawm kumah HSLC Exam Centre thar atan sawrkarin a puan sak chu a lawmpui thu hrilhin Bialtu MLA, khawtlang nu leh pa leh NGO’s te inpekna zar a ni a ti a. Mipuiten mahni ta anga enkawl chhunzawm tlat tura a beisei thu leh Centre hmingtha tak nihtir tum tlat turin a chah a ni. School upa an nihnaah lungawia inchhuang mai lovin school tha leh rintlak zawk nih chhoh zel tuma bei tauh tauh turin thawktute, zirlai naupangte leh khawtlang bu leh pate a chah a ni.

He Jubilee lawmnaa Special Guest Pu JH. Zoremthanga, Chairman MBSE te, Pu Lawmawma, DEO Serchhip te leh Pu H. Zonunsanga, Executive Councillor AMC te pawhin thusawina hun an hmang a ni.

Golden Jubilee lawmna programme hi Lungpho mualzawlah buatsaih a ni a. Pu Lalzarmawia Khiangte, VCP in kaihruaiin Rev. Ricky Lalchhanchhuaha’n Pathian hnenah lawmthu sawi tawngtaina a hmang a ni.