4/2022-2023
Dated Serchhip, the 1st April, 2022: Vawiin khan Mizoram Assembly Deputy Speaker leh Tuikum bialtu ni bawk Er. Lalrinawma chuan tun sawrkar kum thar atanga Central Scheme thar Pradhan Mantri Adi Aadarsh Gram Yojana (PMAAGY) kalpuina tur khuaa atana thlan, a bial chhung khua Hualtu a tlawh.

Hualtu khawtlang hruaitute nena an inkawm honaah Er. Lalrinawma chuan, Tuikum Bial khaw tam tak chu Pradhan Mantri Adi Aadarsh Gram Yojana (PMAAGY) kalpuina tur atana thlan chhuah zingah an awm dawn tih sawiin, Hualtu chu hmalak hmasakna tur khua zingah a tel tih a tarlang a. Hualtu khaw mipuite a lawmpui thu sawiin, bialtu a nih angin a bial chhung khuate thlan an nihnaah sawrkar chungah a lawm hle tih a tarlang bawk. Mipuiten he scheme lo kal tur hi an tangkaipui ka beisei hle a, mahni zawna tihve tur awm ang angte pawh theihtawp chhuaha lo thawk ve thin turin ka ngen cheu a ni, tiin Hualtu khaw mipuite a chah bawk a ni. Sawrkar atanga duhsakna leh indawm kanna tur kan dawn leh kan hmuh te hi tha takin/nihna ang takin hmangthiam zel ila, ram tan khawtlang tan a lo hlawk thin a ni, a ti a. Mizoram sawrkar flagship programme SEDP pawh kan la hmuh chhoh zel dawn a ni a ti.

Pradhan Mantri Adi Aadarsh Gram Yojana Yojana(PMAAGY) hi Sawrkar laipui a Ministry of Tribal Affairs in Thingtlang khua thlan bikte tana hmasawnna hnathawhna tur Scheme a duan a ni a. Sawrkar laipui hian Mizoram ah he Scheme kalpui nan hian khua 344 a rawn thlang a, Hualtu hi khaw thlan zinga mi a ni. PMAAGY hi Sawrkar kum thar 2022-2023 atanga kalpui tan tum a ni a, Social Welfare & Tribal Affairs hnuaiah kalpui dawn a ni.

Inkawm khawmna neih zawh hian bialtu MLA hian hmasawnna hnathawh thenkhat a enkual zui a ni.