No.2471/2021-2022

Aizawl the 4th October, 2021 : Vawiin khan Er. Lalrinawma, Deputy Speaker chuan Tlungvel khua leh a chhehvela Mizo pipute hmun hlui, sulhnu an lo neih tawhnate en theih tura Tlungvel MSU Sub Headquarters-in documentary film an buatsaih chu Dy. Speaker office-ah a tlangzarh.

Dy.Speaker chuan thusawiin ram leh hnam rohlute hi hlut leh humhalh a pawimawh hle a ni a ti a. Tlungvel MSU hruaitute'n hetianga pi leh pute sulhnu hlut a, thangthar zawkte en theih tura an buatsaih chu lawmawm a tih thu a sawi. Ram leh hnam changkang apiangin an thlahtute, an pi leh pute sulhnu hlutna chang an hria a, an humhalh tlat thin thu sawiin hengte hian tourism lamah pawh hmasawnna nasa tak a thlen thin a ni a ti. Tlungvel mipuite pawhin an khua leh a chhehvela pi pute hmun hlui an hlut a, an humhalh chuan an khaw tan hmasawnna nasa zawk a thlen a rin thu a sawi bawk.

Er.Lalrinawma chuan Mizoten pipute sulhnu an ngaihhluta, an humhalh that loh chuan tuman rawn ngaihhlut sakin an rawn humhalh sak dawn lo a ni a ti a. Pipute sulhnu humhalh a, ngaihhlut hian thang tharte thinlungah mahni Mizo hnam ngaihhlutna nasa zawk a tuh ngei a beisei thu a sawi. Ram leh hnam chawisang a, dinhmun tha leh ropui zawkah awm theihna atan chuan hnamin mahni pipute sulhnu, hmun hrang hrang te humhalh leh cheimawi a, chawi vul zual zel a tul a ni, a ti bawk.

He hun hi Pu Laldawngkima, Tlungvel Sub Hqrs MSU President chuan a kaihhruai a; Pu Lalruatfela, Chairman, Documentary Sub-Committee chuan documentary film buatsaih a nih chhoh dan report tawi a pe bawk a ni.