Dy. Speaker leh Mamit bialtu MLA ni bawk Pu John Rotluangliana chuan February ni 10-12 inkar khan a bial chhunga Chakma leh Tuikuk awm bikna deuh khaw hrang hrang a tlawh a. Rawpuichhip-a Sub-Divisional Horticulture Office te, Teirei Forest te, Dampa Rengui, Tuipuibari, Rajiv Nagar, Khantlang leh Dilzawl khuate a tlawhnaah sorkar hnathawk leh mipui ten Dy. Speaker hnenah an mamawh te an lo thlen a, harsatna an tawhte chu theihtawp chhuaha sutkian dan ngaihtuah sak a tum thu Dy. Speaker chuan a hrilh a ni.

Khaw hrang hrang a tlawhnaah Pu John Rotluangliana chuan thusawiin hnam ang zawnga intih hran chuan harsatna a siam thin a, India ram khua leh tui kan nih vek angin Mizoram-a cheng kan nih avangin Mizo vek kan ni, a ti. Bru anga inlakhran tum chu dinchhuahna ni lovin ralna zawk a ni a, chuvangin chutiang rilru pu lo turin a chah bawk. Sorkar laipuiin hnam hnufual zawkte chawikanna tura cheng vaibelchhe 30 Mamit District a rawn pek chu he biala khaw zawng zawng te mamawh chi hrang hrang, a bik takin tui in tur thianghlim an neih theihna tur te, hriselna lama inenkawlna tha zawk awm theihna leh zirna lama hmasawnna kawngah te hman a nih tur thu a sawi a ni.

Dy. Speaker hi nimin February ni 12 khan Aizawl a lo lut leh a ni.