Urban Development & Poverty Alleviation (UD&PA) Department chuan kumin November ni 1 a e-office neih hman ngei tumin chak takin hma an la a. Vawiin khan UD&PA Minister Pu Zodintluanga kaihhruaiin New Secretariat-a CS Video Conference Hall-ah National Informatics Centre (NIC), New Delhi-a e-office Project Monitoring Unit-te nen video conferencing neih a ni.

Minister Pu Zodintluanga chuan e-office hman thuai a nih theih nan Mizoram sawrkar chuan muangchang lovin hun tiam chhung ngeia hmanraw mamawh zawng zawng lei fel a, tih tur tul zawng zawng tihfel hman an tum tih a sawi a. New Delhi lam an in peih veleh department chuan hmang tan nghal thei turin a inpuahchah fel vek dawn a ni, a ti.

E-office nei tura inbuatsaihna kal zelah department mamawh tur zirchianna neih a ni tawh a. Department chhungah internet hmanga inthlunzawmna siam tura hmalak mek a nih bakah State Data Centre nena inthlunzawmna tur pawh buaipui thuai a ni ang. Mizoram sawrkar hian NIC, New Delhi hnenah lehkha pawimawh leh tul engemawzat a thehlut tawh a. Sum mamawhte inhlan fel a nih hnuah NIC, New Delhi hian State Data Centre-ah e-office application an install ang a. Sawrkara a tak taka hmangtu tur te zirtir tur master trainer-te tan training an buatsaih dawn a ni.

E-office hi file leh lehkha kenkual ngai lova, computer leh laptop hmanga awlsam taka hna thawh theihna tur a ni a. A taka hman a nih hunah chuan file-te hi office chhung atang chauh ni lo, ram chhung hmun dang leh ram pawn thleng pawhin internet connectivity awmna apiangah Minister te leh official ten an enin an kaltir thei dawn a ni. NIC hian tun dinhmunah e-office software hi computer leh laptop kaltlang chauha hman theih turin an duang a. Cell phone leh tablet atanga khawih theih turin hma lak mek a nih thu Video Conferencing-ah hian tarlan a ni bawk.

Meeting-ah hian UD&PA bakah Information Communication Technology (ICT) Department leh Raj Bhavan atangin official-te an tel bawk a. Department pahnihte bakah Raj Bhavan hian e-office neih tuma hma la in UD&PA hian bul an tan dawn a ni.