April ni 22 hi ‘Earth Day’ atan kumtin khawvel pumah kum 1970 atang khan hman a ni thin a, Mizoramah pawh kum 1990 atang khan hman tan a ni. Mipuite hnenah kan chenna lei (Earth) leh min hualveltu humhalh a pawimawhzia zirtir nan hman thin a ni. Earth Day-ah hian khawvel hmun hrang hrangah mite pungkhawmin, kan chenna khawvel tibawlhhlawhtu thenfai te, kan chenna lei leh boruak tichhe thei ven te, ramkang ven te leh kan chenna khawvel tibawlhhlawhtu tihtlem kawnga hma kan sawn theihna tura inzirtirna te neih thin a ni.

 

 

He Earth Day hman tulna chhan ber chu he leia Pathian thilsiamte leh mihring te inbuk tawka kan khawsakna tura siamtha theitu chu mihringte ngei hi kan ni tih kan hriatchhuah thar lehna tur leh chumi kawnga ke kan pen hi a ni.

Mizo mipuite hian kan chenna leilung leh a hausakna humhalh kawngah zir tur kan la ngah hle. Kan chakkhai tinreng min petu kan ramngaw leh a chhunga cheng nungcha humhalh kawngah te, bawlhhlawh sawngbawl dan te leh lui tui kan enkawl dan chungchangah te hian nasa taka tan kan lak thar a tul a ni. Vawiin ni 22 Earth Day kan lo thlen hian kan chenna leilung enkawl turin mawhphurhna leh thawh ve theih kan nei theuh a. Ramngaw leh ramsa humhalh hna thawktu Department leh pawlho tawiawm te, boruak leh leilung tibawlhhlawh thei hrang hrang dona kawnga sorkar tanpui te hi he ram khua leh tui kan nihna anga kan mawhphurhna a ni tih i hrethar leh theuh ang u.

Mizoram bikah hian kan ramngaw hausakna leh leilung tichhetu chimawm tak, nungchate boralna thlen thintu chu ramkang hi a ni tih kan hre awm e. Kan rama kan eizawnna pui ber kan lo neih danin a zir loh vang te, kan fimkhur tawk loh vangte in kumtin nasa takin ram kan tikang thin a ni. Hei hian kan ram a tihmelhema, a chhunga cheng zofate min timualpho thin a ni. Kuminah hian kum kalta lama mau tam avang leh khua a ro zual em avangin ram kan tikang nasa zual hle a, a pawi em em a ni. Ramkangin kan ram a tihchhiat dan hi chhut thiam harsa khawp a ni. Earth Day kan hman mekah hian ram tikang tawh lo tur leh ramkang a lo chhuah pawha thelh turin i intiam thar leh ang u.

Kuminah chuan EARTH DAY hi Environment & Forests Deptt. bultumin a tha thawh (action oriented) zawngin hman a ni a. Aizawl huamchhung veng hrang hrangah YMA branch thenkhat leh section thenkhatte chuan zingkarah hnatlang neiin, an veng chhung theuh leh an chhehvel, khawlai leh kawngdung bawlhhlawh thenfai leh luikawr leh culvert thenfai te leh, puipunna hmun tifaiin an hnatlang hlawm a ni. Veng thenkhatah chuan vengchhung thianfai hian MHIP leh MUP te pawh an hnatlang bawk. Tin, EARTH DAY pual hian Govt. Mamawii Higher Secondary School zirlaite leh Home Mission Higher Secondary School zirlaiten Aizawl khawpui chhung hi chan insemin Kulikawn atanga Chanmari thleng kawngpui dung bawlhhlawh thenfai hna an thawk bawk a ni. Tin, Home Missions Higher Secondary zirlaite hian motor a veivakte leh kawngpui dung a dawr neite leh mipui hnenah ‘kan khawpui hi nang leh keia ta a ni a, chenna tlak leh thianghlima siama, ti hring a, khawpui hrisel ni turin vawiin atang hian tan I la thar ang u’, tiin ngenna te an sem a ni. YMA, MHIP, MUP leh zirlaite hian an hnathawh hma in Principal Chief Conservator of Forests, Pu SS Garbyal-a thuchah chu chhiarchhuahna an nei theuh bawk a ni. Hnatlangte hian anmahni huamchhung theuhah Poster thahnem tak an tar bawk a ni. Poster hi Govt. Zirtiri Residential Science College zirlai engemawzatin an mahni veng theuhah an tarin Earth Day hlawhtlinna atan hian tha an thawh bawk a ni. EARTH DAY banner pawh hmun remchang leh langsar laiah tar a ni bawk.