East Tuipui Bialtu MLA Pu T Sangkunga chuan vawiin khan Thinghrangkawn-a Tuipuiral YMA Run  hawn a hmanpui.

Tuipuiral huam chhunga hmun laili, khaw hrang hrang kawng peng intawhkhawmna hmun Thinghrangkawn-ah hian Tuipuiral Group YMA chuan kum 2007 atang khan In sak tumin hma an la tan a. BADP, MLA leh MP fund hmangin a theih ang anga an thawh hnuah vawiin khan hawn theihin an peih ta a ni.

Khuallian leh Bialtu MLA ni bawk Pu T Sangkunga chuan YMA rawngbawlna chu ropui a tih thu sawiin YMA hmalakna thenkhatah sawiseltu lo awm ve bawk mah se khua reiah ram leh hnam, khawtlang tan a lo tha zawk zel niin a sawi a. YMA chu khawtlang nun vawnghimtu a nih bakah ramngaw, nungcha leh tuihna humhalh kawngah pawl pawimawh ber niin a sawi bawk.

Hawnna inkhawm hi Pu H. Lalniliana Group YMA President-in a kaihruai a, Pu JH Lalkrossthanga Run sak dan tlangpui report  pein, a vaiin cheng nuai 17 lakhs hmuh a ni a, in sakna atan hian cheng nuai 14 hmangin cheng nuai 3 chu YMA hmalakna dangah pawhpen niin a tarlang. YMA Run hi Group YMA-in kawngpui siam ram mut hnatlang an neih tuma an rawt chhuah a ni a. A bul tan chhoh laiin tuna an bialtu MLA ni ta Pu T Sangkunga’n sawrkar hna a thawh laia theih tawpa a buaipui thu leh tuna a MLA fund hmanga hawn theiha peih a ni chu lawmawm an tih thu a sawi a ni. 

Vawiina YMA Run hawnna hun hi Champhai Sub-Seadquarters YMA atangin Pu RC Rodawla, Treasurer leh Pu Lallawmzuala, Asst Secy te’n an telpui a, Group YMA hruaitu hlui thahnem tak an tel bawk. Group huam chhunga fa nei tam – fa 7 aia tam neite hnenah Sub-Headquarters YMA-in chawimawina a pek chhungkaw 10 hnenah Lawmpuina Thuziak hlan a ni bawk.