Association of Indian Universities(AIU) East Zone Vice Chancellors’ Meet chu nimin tlai khan Tourism Multipurpose Hall Berawtlang ah neih tan a ni a. Governor Lt.Gen(Rtd) M.M.Lakhera chuan hawnna inkhawm hi a hmanpui a ni.

 

 

Kumina East Zone Vice Chancellors’ Meet ah hian thupui atan “Expansion of Higher Education : Challenges of Maintaining Quality” tih neih a ni a. Khuallian Governor chuan thu sawiin “Zirna chu in sak ang a ni a, a innghahna lungphum a ngheh loh chuan a ler a siam that tumin awmzia a nei lo” a ti a. Zirna sang zawk, higher education huang zauh chu Universities te hma lakna tur a nih rualin ruahmanna fel tak leh a ruhrel pawimawh din hmasa lova huang tihzau chu Universities te tih tur a ni lo, tiin khawthlang ramte tihdan apiang entawn chu India ram mamawh a ni lo, a ti a. Ram hmasawnna  thlir tela Universities hrang hrang ten an bial mila zirna course an buatsaih te, zirlai te mi puitling ni tura chher te, khawthlang ram ten zirna an kalpui dana a thalai apiang kan ram mamawh mila her danglam te chu zirna siam tha tura hma lakna tur pawimawh a ni a ti a. Zirna kalphung siam tha turin Universities te chuan India ram dinhmun nen a inmil lo “change” an hnar ngam a pawimawh a ni, a ti.

Vice Chancellors’ Meet hawnna ah hian Prof.P.T.Chande, Vice President AIU; Prof Veena Shah, Secretary General AIU leh Prof A.N.Rai, Vice Chancellor, Mizoram University te pawhin thu an sawi a. Association of Indian Universities hi kum 1925 khan member 14 lek awma din niin tunah chuan member 488 an awm tawh a. Tun tum hi Mizoram-in East Zone Vice Chancellor te intawh khawm a thlen vawi khatna niin University hrang hrang atangin member 29 an lo tel a ni.