2604/2023-2024

Aizawl, the 2^nd November, 2023: Kan hma lawka inthlanpui General Election to the Legislative Assembly, 2023 nei tur State hrang hrang 5 (Mizoram, Chhattisgarh, Madhya Pradesh, Rajasthan leh Telangana) te bakah an thenawm State 12 te chu vawiin chawhnu dar 3 khan Video Conference kaltlangin Chief Election Commissioner (CEC) Pu Rajiv Kumar bakah Election Commissioner (EC) pahnih Pu Anup Chandra Pandey leh Pu Arun Goel te'n an kawm a; he hun hi Chief Secretary Dr. Renu Sharma, IAS hovin CS Conference Hall atanga zawm a ni.

Election Commission of India hotute chuan inthlan hmachhawn mai tur State te'n harsatna lian tham an nei lo leh thenawm State-te nena   thawhhona tha tak an nei chu lawmawm an ti a. Vote zawnna hmanraw hrang hrangte do tlan a pawimawh thu te, ramri kaltlanga dan lova ruihhlo, bungrua leh hmanraw dang tawlh ven leh State ramri khauh taka venhim a tul thute an tarlang a. State hotute chu inthlanna muanawm, dik leh langtlang, hlawhtling leh entawntlak lantir tum turin an chah a. Buaina leh tharum thawhna a awm loh nan leh vote tla a that theih nana thahnemngai taka hma la zel turin an chah a. Sawrkar thuneitute leh Election official-te chu re-poll a awm loh nana hma la turin an chah bawk.

He huna Mizoram aiawha thusawitu Chief Secretary Dr. Renu Sharma, IAS chuan ECI duhdan leh inkaihhruainate zawm chunga inpuahchahna kalpui chhoh mek zel a ni, a ti a. Mizoram chu State ralmuang tak a nih thu tarlangin, tun dinhmunah Dan leh thupek kenkawh kawngah harsatna lian tham a awm loh thu a sawi a. Thenawm State Assam, Manipur leh Tripura thuneitute nen pawh inbiakpawhtawn reng a nih thu a sawi a. Ramri ngawrh taka ven a nih thu leh campaign tawp hun atanga inthlan zawhfel thleng ramri khar tlat tum a nih thu a sawi bawk.

DGP Mizoram Pu Anil Shukla, IPS chuan inthlanna muanawm leh felfai neih a a beisei thu a sawi a. Venhimna kawnga CAPF mamawh belh a nih thute sawiin, inthlan puan hnua enforcement agency-te hmalakna a tarlang bawk.

Meeting hi inthlanna muanawm, felfai leh langtlang neih a nih theih nana hmalakna niin, inthlang mai tur State bakah thenawm State kaltlanga dan lova thil tih dona kawnga thawhhona tha zawk a awm theih nana ruahman a ni. Vote zawn nana pawisa, ruihhlo leh therhlo dangte a hluar loh nana ramri ven uluk a tul thu tarlan niin, inthlang tur State 5 leh an thenawm State 12 a Chief Secretary (CS) leh Director Genreral of Police (DGP) te'n inthlan kaihhnawih inpuahchahnate, mamawh leh hmachhawp neihte an tarlang a. He hunah hian thenawm State-a Sawrkar hotute chuan inthlanna muanawm leh felfai neih a nih theih nan dan leh thupek kenkawh kawngah inthlang tur State-te an thlawp tlat tur thu an tarlang bawk.

Vawiin chawhma khan ECI hotute chuan Chief Electoral Officer (CEO) Mizoram Pu Madhup Vyas, IAS leh District hrang hranga Observer-te Video Conference kaltlangin meeting an lo neihpui tawh bawk.