678/2023-2024
Aizawl the 5th June 2023 : Pachhunga University College, Mizo Department buatsaih, Ni hnih awh 'Khuarel leh Thu leh Hla Inkungkaihna: Mizo Thlirna aṭangin' (Ecocriticism and Environmental Studies : A Mizo Perspective) tih chu vawiin khan Pu TJ Lalnuntluanga, Minister of Environment, Forest and Climate Change, Govt. of Mizoram chuan a hawng.
Hawnna inkhawmah hian khuallian chuan, Thu leh Hla leh environment humhalh hi a lo inkungkaih thuk hle a. Thing leh mau, nungcha leh thil siam mawina leh an ṭangkaina te hi thu leh hla thiam ten an lo phochhuak ṭha hle a ni, a ti a. Mizo hla phuahtu hmasa ten Mizoram mawina te, lui leh tlang, thing leh mau leh nungcha chungchang an lo tarlante kha a hlu takzet a. Tun lai hunah hian khatianga infuihna thu tha kha kan la mamawh reng a ni, a ti a. PUC Mizo Department-in hetianga environment humhalhna lam kaihhnawih seminar an buatsaih chu lawmawm a tih thu a sawi bawk a ni.
Pu TJ Lalnuntluanga chuan thing leh mau, nungchate humhalh turin sorkar pawhin a theih ang angin hma a lak mek thu a sawi a. Luipui kam humhalh turin project lian tak kalpui mek a nih thu a sawi bawk. G20 summit thupui - One Earth, One Family, One Future tih hian khawvel mihringte hi chhungkaw pakhat, mamawh leh harsatna in ang tlang kan nih thu a tarlang a. He thupuiin a tum pawimawh tak zinga mi chu khawvel lum zel (Global Warming) ti ziaawm tura tan lak a nih thu a sawi bawk.
He seminar hi G20 summit denchhena, Mizoram University bultuma Mizo department, PUC in an buatsaih a ni a. Remlalthlamuanpuia, Seminar Secretary report aṭanga a lan danin, Mizoram pawn aṭangin Rerource person pathum an tel a, Aizawl pawn aṭangin pathum, Aizawl chhung aṭangin 13 an tel thei a. An zingah hian professor 3, Associate Professor 4, Assistant Professor 9 leh Research Scholar 3 an tel a ni.
Seminar -ah hian Prof. R.Thangvunga chuan keynote address a sawi a. Mihring chu thil siam zinga derdep ber ni mah se, a bul vela thil awm te enkawl tur leh venghim tura khuanu duan a nih thu a sawi a. Chuti chung chuan mamawhna avang leh chhan hrang hrang avangin khuarel tihchhiat a ni a. Heng mihring nun nena a inkungkaihna hrang hrang hi thu leh hlaah a lo lan ṭhin thu a sawi a ni. He seminar-ah hian Pu HS Lalsangpuia, Vice Principal, Pachhunga University College chuan thu a sawi a, Dr. Lalnunpuia Renthlei, Coordinator chuan lawmthu sawiin hun hnung a khar a ni.
Seminar hawnna inkhawm PUC Seminar Hall-a buatsaih hi Pi Enid H.Lalrammuani, Asst. Professor chuan a kaihruai a, Dr. H.Laldinmawia, Head of Department chuan inlawmna thu a sawi a. Seminar hi vawiinah PUC Seminar Hall-ah chhunzawm leh tur a ni a, mithiam hrang hrang 12 te paper zirho leh a ni ang.
Attachment
- Loading attachment...
