Tukin zing khan MHIP Run, Edenthar-ah Mizoram Building & Other Construction Workers Welfare Board kaltlangin Board hnuaia inziaklut ni tina inhlawhfa leh kut hnathawktu mi 110 hnenah an fate zirna puibawmna Children Educational Assistance pek an ni a, he hun hi Pu Lal Thanzara, Minister leh bialtu MLA ni bawk chuan hmapuiin tanpuina sum hi heng chhungkua te hnenah hian a hlan. Vawiina tanpuina sum sem hi a za vain cheng 4,42,000.00 a ni a, chhungkua pakhatah naupang pahnih zel tan pek a ni a, naupang pakhatah cheng 2000 zelin.
Pu Lal Thanzara chuan ni tina inhlawhfa leh kut hnathawktu hamthatna leh an dinhmun chawikan chu Sawrkar chuan a ngaipawimawh a, Labour Welfare Fund kaltlangin heng mite tan hamthatna thahnem tak duan niin tanpuina pawh hmun hrang hranga sem a nih tawh thu a sawi. Mirethei leh mi harsa zawka ten khaw eng an hmuh theihna turin Sawrkar chuan scheme te a duang chho a nihmasela a mamawh ngawih ngawih ten heng scheme hnuaia inziahluh nachang te an hriat loh thin fo avangin tanpuina an dawn thei awm ang te chu an chan thin a, chuvangin Mizoram Building & Other Construction Workers Welfare Board leh Mizoram Healthcare Scheme hnuaia inziaklut turin mite hrilh leh hemi chungchang inhrilhriat zel a pawimawh a ni, a ti.
Board hnuaia Assistant Commissioner of Labour Welfare Pu Francis Lianmawia chuan programme hi kaihruaiin Board-ah inziaklut te tana hamthatna hrang hrang awm leh a pek theih dan te a sawifiah.
Mizoram Building & Other Construction Workers Welfare Board hnuaiah hian member-te chu an fate pahnih sikul kalna senso atan kum khatah Rs. 2,000 thleng a tumsak thei a, an damloh chánga an inkawlna te, nupui/pasal an neihnaahte an tanpui theih bakah, an hnathawhnaa an thihin luman/ràlna an pe thei bawk.
Welfare Board-ah hian member ni turte tan registration fee-ah Rs. 25 chawi tur a ni a, mimal inhlawhfa bikte'n kum khatah Rs. 145 an chhûn luh a ngai a, member ni turte hi kum 18-60 inkar an ni tur a ni.
Welfare Board-ah hian Mizorama contractor, department leh Assam Rifles, construction work khawihte'n an hnathawh project cost atangin 1% an thawh a; sorkar laipui atang te, member in register-na te, loan interest leh bank interest leh Board-in hmun dang atanga sum a lak luh atangtein sum hmuh a ni.
