3647/2024-2025

3rd December, 2024 : Department of School Education and Literacy, Ministry of Education buatsaih National Achievement Survey (NAS) tiha kan lo hriat thin, PARAKH Rashtriya Sarvekshan 2024 (PRS 2024) chu naktuk December ni 4, 2024 hian Mizoram chhunga school thlan bik 1058–a Pawl 3, Pawl 6 leh Pawl 9 zirlaiteah kalpui a ni dawn a. Central sorkar hmalakna a nih avangin school registration thleng khawih thei thil a ni. He survey pawimawh tak kalpuina tur atan hian State Level Coordinator pahnih ruat an ni a, chungte chu Director, SCERT leh State Project Director, Samagra Shiksha, Mizoram te an ni a, district tina DIET Principal leh DPC te chu District Level Coordinator niin, Field Investigator (FI) atan DIET zirlaite hman an ni dawn bawk. 

PARAKH Rashtriya Sarvekshan 2024 hi India rama zirna chungchanga survey lian ber niin zirlaiten an thiam chhuah tura duante an zir chhuak em tih enna tura buatsaih a ni. National Education Policy (NEP) 2020 ina zirna atana a tum bulpuite ngaihpawimawh a nih dan te, zirnaa kan hnufualna te, zirna huapzo (inclusive education) kalpui a nih dan te bakah education policy duangtuten quality education atana policy tha tak an duan chhuah theihna tura an hriat tur pawimawhte he survey hian a hrin chhuah beisei a ni. 

PRS 2024 atana sample school thlanchhuahte chuan survey ni hian 100% attendance an nei ngei ngei tur a ni a, nei lo kan awm anih chuan na taka action lak a ni dawn a ni. He survey hi a hlawhtlin theihna tur hian SCERT-ah War Room siam a ni a, harsatna nei kan awm anih chuan a hnuaia official hming leh contact number kan tarlanah hian hriattir tur a ni.