Nimin (Dt 22.6.2015) khan Industries Minister Pu H.Rohluna tuna Delhi a cham mek chuan Union Textile Minister Santosh Kumar Gangwar a hmu a, Mizote tana a thahnemngaihna leh inpeknaah lawmthu hrilhin, Mizoram mamawhte a thlen nghal.
Pu H.Rohluna hian Union Textile Minister chu Mizoram-a Handloom tihhmasawnna tur kawng hrang hrang a sawipui a. Tuna hmalakna kal mek Weaver’s Service Centre Chaltlang a mi hawng turin a sawm a, July 3, 2015 a Aizawl-a lokal a, rawn hawn a remtih thu Union Minister hian Pu H.Rohluna chu a hrilh. He centre hi Chaltlang-a ZOHANCO building-ah bul tanin floor hnih luah phawt a ni dawn a, Guwahati atangin khawl chah chhoh a ni dawn a, training chi hrang hrang design training te leh puan dum te thlengin zirtir an ni dawn a ni. Industrial Growth Centre Luangmual-a Incubation centre for apparel manufacturing cheng vbch 20 senga dinna tur lungphum pawh Union Textile Minister hian phum a remtih thu Pu H. Rohluna hi a hrilh a, July 3,2015-a a lo kal hunah hian he lungphum hi a phum nghal dawn a ni. He Incubation Centre dinna senso hi a zavaiin sorkar laipuiin a tum tur a ni a, hemi atan hian Mizoram sorkar chuan ram an mamawh 1.5 acre a pe a, NBCC in an thawk tan tawh a ni.
Pu H.Rohluna hian Thenzawl-a Handloom Project vbch 8 senna din tum chu Union Minister hnenah hian a thlen bawk a, he project hi hun remchang hmasaah Chief Minister-in a hawng dawn a ni.
Teacher Education lamah School Education Minister ni bawk Pu H.Rohluna hian SCERT hnuaia DIET 8-a thawktute hlawh MHRD in sum a pek chhuah mai loh avanga harsatna awm reng chu Anamika Singh Director Teacher Education MHRD hmuin chinfel a ni a. December 2014 atanga thawktuten hlawh an lak theih loh reng chu an la thei dawn ta a, hemi atan hian Kum 2014-15 chhunga MHRD in a tum tur 2nd installment Rs 820.09 lakh chu release nghal a ni a, sanction order pawh Director, Teacher Education hian Minister kutah hian a hlan nghal a ni.
Pu H.Rohluna hi Delhi-ah a la cham mek a, vawiin lamah hian CSS hnuaia Hindi teacher 1305 hlawh a buaipui leh dawn a ni.
