1279/2024-2025

Aizawl, 23.07.2024: Dr. Vanlalthlana, Minister, School Education and Hr. & Technical Education Dept. chuan vawiin chawhnu khan Mizo Writers Association (MWA) in I&PR Auditorium-a MWA Foundation Day 2024 a buatsaih chu khuallian niin a hmanpui.

Minister chuan thu sawiin Mizo ziakmite chu Mizo history chabi kawltute an nih thu a sawi a. Thu leh hla in thil a tih theih zia te, khawtlang nun leh ram inrelbawl dan thlenga a nghawng thui theih zia sawiin Minister chuan thalaite kawng dik kawhhmuh a, ram siamdanglam tura thalaite kaihruaitu ah ziakmite chu a sawm a. Mizo ziakmite kutchhuak thu leh hla hlutna leh pawimawhna hrang hrang sawiin Minister Dr. Vanlalthlana chuan heng thu leh hlate hi keini bak a hlut tu tur kan awm chuanglo a ni, a ti a.

Hr. & Technical Education Minister chuan zirlaite'n Mizo Literature tha awlsam zawka an hmuh theih a, College library Mizo Literature Section changtlung tak a awm chu a ngaihpawimawh thu a sawi bawk a. Hemi atan hian Aizawl North College library a dah turin MWA member te chu a tlem berah cheng sing hnih man Mizo ziakmite kutchhuak lo thlangkhawm turin a chah a. Chhunzawm zel tlak a nih dawn chuan hmalak zel theih dan tur te ruahman a nih theih tur thu a sawi.

Vawiin MWA Foundation Day lawmna hi MWA Adviser Prog. J. V. Hluna chuan a kaihruai a. Secretary Pu H. Ngurthansanga chuan report pe in, Treasurer Pu T. Lalnunsiana chuan MWA dintu mi paruk - Pu C. Rokuma, Pu Selet Thanga, Pu J.F. Laldailova, Pu James Dokhuma, Pu R.L. Rina leh Pu R. Lalrawna te chanchin presentation a pe a. Founder Member zinga la dam awm chhun Pu R. Lalrawna, MWA Adviser ni bawk chuan thu sawiin, MWA President Pu R. Lallianzuala chuan lawmthu sawiin hun a khar a ni.

Mizo Writers Association (MWA) hi July ni 23, 1977 ah din niin kum 47 a upa a ni tawh a. Din tirh atangin MWA chuan Mizo tawng tihhmasawn nen leh Mizo thu leh hla tihhmasawn nan kawng hrang hrangin hma a la thin a. An hmalakna zingah Lehkhabu lehlin tha ber Lawmman hlan te, Mizo Proficiency Prize siam te, Thu leh Hla Kutpui buatsaih leh Lehkhabu Pho Runpui (LPR) /bookfest neih te a tel a ni.