Vawiin khan Education Minister Pu Lalsawta chuan Mizoram Primary School Teachers Association General Conference vawi 3-na Vanapa Hall-ah a hmanpui.
Minister chuan theihtawp chhuaha sorkarin zirna siamtha tura tan a lak thu sawiin a hlawhtlinna tur chuan tihtur tul leh ken tel tam tak a nei a, a taka thawktu zirtirtuten mawhphurhna sang tak  an nei a ni, a ti. Minister chuan Mizoramah hian Industry lian a la awm ve loh avangin thawktu ruai hnem thei awmchhun chu sorkar a ni a, chuvangin Mizoram chhung chauha hnathawk tura rilru dah a hun tawh lova, India ram mai nilo khawvel hmun hrang hranga thawk tlak mi thiam chherchhuah a tul a ni,  a  ti a. Zirna kalphung thar, Continuous and Comprehensive Evaluation, Mizorama hman tan mek pawh chuan rah tha a chhuah ngei a beisei thu sawiin zirna chu nun tibeidawngtu ni lovin min tihlimtu, beiseina min siamsaktu a ni tur a ni, Pu Lalsawta chuan a ti.

Minister chuan MPTA-te chu pawl hlun leh puitling an nih anga tute emaw fuihpawrha awmlo turin a chah a, harsatna chingfel tur chuan inralnawr aiin dawhkan kila sawiho a tangkai ber a ni, a ti a. Primary zirtirtu pension ten harsatna an tawkfo thin chu pawi a tih thusawiin theihtawp chhuaha chinfel ngei a tum thu a sawi a ni.

MPTA Conference hi an President Pu H. Lalthlamuana'n a kaihruai a. MPTA chanchin ziahna lehkhabu, Pi F Lalramliani buatsaih chu Minister hian a tlangzarh nghal a ni.