Education Minister-in Vawiin khan I&PR Conference Hall-ah National Level Seminar a hmanpui. He Seminar hi UGC bultuma Govt. J. Thankima College leh Mizoram Educational Foundation te tangruala “Economic and Educational Security with refrence to North East India” tih thupui hmanga ni hnih awh tur an buatsaih a ni.
He Seminar hawnna inkhawm hi Dr. LN Tluanga, President, Mizoram Educational Foundation in a kaihhruai a, Khuallian Pu Lalsawta chuan thusawiin, Mizoram pawn lam atanga he seminar chhim tura lokalte thlenna nuam leh enkawlna tha tawk a awm loh avanga thupha chawiin an cham chhung MIzorama hlim taka hmang turin duhsakna a hlan a. Pu Sawta chuan, Insurgency problem hi North East State te hian kan hmachhawn theuh a, mahse he buaina hian ziaawm lam pan chho in kum sawm lokal leh turah chuan min kiansan a beisei thu a sawi a. North East State te hian thil ropui tak siam chhuak theilo mah ila zirnna tha tak erawh chu kan siam thei a, Mizoram hi chumi hmunpui atan chuan kan siam thei a ni, a ti. Minister chuan, Kumin April thla thar atang hian Right to Education Act kan hmang tan dawn a, Nausenin nu hnutetui dam khawchhuah nan a hmang ang hian Education hi mihring nun khawchhuah nan kan hmang tangkai thei dawn a ni, a ti. Minister chuan, Education hi pawisa invest na tha ber a ni a, a pawimawh zia hi India hruaitute’n hriain an policy pawh helam hawi hian an thlak mek a, Mizoram-ah pawh India Institute of Technilogy hawn thuai tum a ni.
Pu Ramhmangaiha Ralte, Principal Govt. J. Thankima College chuan keynote address sawiin, Seminar thupui atan “Economic and Educational Security with refrence to North East India” thlan a nih chhan te a sawi lang a, tunlai khawvel hmasawnna kawngah ‘Human Capital” nei ngah ram apiangin hma an sawn chak thute, ‘Human capital’ siamchhuahna hmunpui Higher Education te pawhin ngaih pawimawh a hlawh dante a tarlang bawk. India ram hi economic lama a thanna hi a tha chho viauna a mahse ‘human capital’ lamah kan hausak tawk loh avangin economic lama kan thanna hi a ngelnghet tawklo niin mithiamten an hmu a. A bikin Prime Minister Manmohan Singh-a hmathlir ‘human capital’ tihhmasawn tumna kawnga a hmachhawp mekte a sawi lang a. Kum 2015-ah chuan college a lut chin tuna mihring za zela 12.7(% ) ni mek hi za zelea 20(%)-ah tihpun an tum a. 11th Five Year Plan chhungin University thar 1,500 dinna tur ruahman a ni a ti. Hetiang taka Higher Education in ram hruaitute ngaih pawimawh a hlawh avang hian UGC Pay Recommendation pawh siamchhuah a ni, a ti.
He Seminar-ah hian mithiam state chhung leh pawn atangin engemaw zat an rawn kal a. Thupui pawimawh tak tak zir tur rawn inbuatsaihin tangkai thei ang bera hman tum a ni. Naktuk tlaiah he Seminar hi kharna hun Pu Chawngtinthanga, Parliamentary Secretary in a hmanpui dawn a ni.
