Mizoram Secondary School Games vawi-31 kharna programme chu vawiin khan Education Minister Pu Lalsawta’n Ramhlun Sports Complex-ah a hmanpui a. He programme hi Pu J. H. Biakmawia, Joint Director, School Education Department chuan kaihruaiin Organizing Secretary Pu F. Zokima’n School Games report tawi a pe. School games hi May ni 28 khan a ni.
Pu Lalsawta chuan zirlai leh thalai kalkhawmte chu Mizoram nghakfak anih thu sawiin tunhnaia Mizo tlangval in Khawvelah tlangsang ber Mt. Everest chhip a thleng thei hian Mizote hi tumruhna, taimakna leh tuarchelna nen thil kan tih chuan kan ti ve thei a ni tih chiangtu a ni, a ti a. Kan thiamna te tih phuisui a, tlawm hunah tlawm a, huaisen hunah huaisen a, tih takzeta theitawp kan chhuah chuan Zofate chuan theih loh kan nei lo a ni,a ti bawk. Sports Discipline hrang hrang a titha te leh Team Champion te chu Minister hian Trophy a hlan nghal bawk a ni.
Tun tuma Secondary School Games a hian District hrang hrang atangin zirlai 596 ( mipa 330 leh hmeichhe 266) an tel a; Zirtirtu 57 in an ho a ni. Sports discipline pariat - Athletics, Archery, Badminton, Football, Hockey, Taekwondo, Table Tennis, leh Volleyball ah te District Team ten inelna an nei a. He Games ah hian Overall Champion chu Aizawl District niin Medal 30 (Gold-14; Silver-9 leh Bronze-7) an la a, Kolasib District chu Runners Up niin Medal 27 (Gold-9; Silver-11 leh Bronze-7) an la. He Games ah hian Best Athlete (Mipa) chu R. Lalawmpuia Kolasib District niin Medal 5 (Gold-4 leh Silver-1) a la a. Best Athlete (Hmeichhia) chu Lalnunpuii Aizawl District niin Medal 5(Gold-4 leh Silver-1) a la bawk a ni.
Mizoram Amateur Taekwondo Association (MATA) Mission Team chuan Display hmuhnawm tak an entir a, zirlai naupang za chuang in Cheraw an entir bawk a ni.
