Vawiin khan Zuangtui High School Silver Jubilee lawmna School Education Minister Pu H. Rohluna’n a hmanpui a. He hunah hian Bialtu  MLA leh Deputy Speaker nibawk Pu R. Lalrinawma chuan Zuangtui High School Office Building thar MLA Fund atanga sak chu  a hawng nghal a ni.

School Education Minister Pu H. Rohluna chuan thu sawiin Zuangtui High School –in Silver Jubilee an thleng thei chu a lawmpui thu leh HSLC result hnuhnung berah an zirlaite an pass kim vek chu  lawmawm a tih thu a sawi a. Mizorama zirna siamthat nan leh hmasawn nan theihtawpin sawrkarin hma a lak thu sawiin zirtirtu quality tha in zirlai quality tha an chherchhuah theihna turin zirtirtu hna lak pawh MPSC kutah dah vek anih tawh thu a sawi a. Minister chuan Pre-Service training seat changlo an awm tawhlohna turin Aizawl leh Lunglei DIET-ah B.Ed Course nakum session atanga  hawn tan tura ruahmanna siam anih thu leh beng hriatna leh mithmuh lama harsatna nei te tan B.Ed Special Education Course hawng tura hmalak mek anih thu a sawi bawk a ni.

Pu H. Rohluna chuan sawrkar laipuiin India ram chhunga zirtirtu zawng zawngte training chhuak vek  tura a duh angin hemi atan hian chak taka hmalak mek anih thu leh nakin lawkah chuan zirtirtu government ani emaw private  leh  adhoc  grants-in-aid school ah te pawh  training chhuak chauh an thawk thei tawh dawn, a ti a.  School Education Minister chuan tunlaiin inelna a san tawh avangin hlawhtling tur chuan taimakna leh tih tak takna a pawimawh tiin zirlaite a fuih a. Zuangtui High School-a thawktute chu ram tana chhawr nahawm zirlai chher chhuak zel turin a fuih bawk a ni.

He huna Khualzahawm bialtu MLA, Deputy Speaker ni bawk Pu R. Lalrinawma pawhin thu  sawiin  Zuangtui High School in HSLC result a 100% pass percentage an nei chu lawmawm a tih thu a sawi a. Zirlaite chu an kal zelnaah kawng awlsam hlir ani theilo tiin hrehawmna leh harsatna tawn tlang peihte tan chauh hlawhtlinna a awm, a ti a. Pu R. Lalrinawma chuan tunlai khawvel changkanna in a ken tel internet leh mobile te hmangsual lova hmasawnna tura hmang zawk turin zirlaite chu a chah a ni.

Zuangtui High School Silver Jubilee lawmnaah hian Headmaster Pu J. Lalvarlien Puroulte chuan report pe in , HSLC zirlai tithate hnenah chawimawina hlan nghal  a ni a. He hunah hian Pu Lalnuntluanga Hnamte Principal DIET Aizawl pawh a tel a ni.

Zuangtui High School hi kum 1992-a din niin Adhoc aided school a ni a. Tun dinhmunah zirlai 91 an nei mek a. School Office Building thar hi Rs 5,79,413 vel senga sak a ni.