Mizoram SSA Teachers’ Association Sub-Hqrs Kolasib Conference vawi 1 na ah vawiin khan Education Minister Pu H.Rohluna chu khuallian ni in a hmanpui.

Khuallian chuan Zirna leh ram hmasawnna chu a inkungkaih thui hle a ni tiin ram changkang leh hmasawn chu zirna ngai pawimawh ram an ni tlangpui a, Zirna ngai pawimawhna leh zirtirna dik chuan ram hmasawn ah a hruailut thin a ni a ti. Mizoram ah Zirtirtu mahni awmna hmuna awm tha duhlo leh aikal mi tlinglo (qualified lo) lak chingte chuan zirna kawngah harsatna tamktak an thlen thin a ni a ti a, hmun tamtak ah zirtirtu mahni zirlai ruihkhalh ching mai te an awm thu tarlangin mahni hna a rinawm taka hnathawh a pawimawh thu a sawi a. Zirlai te chu kan ram nghahfak an nih avangin zirtirna dik leh tha chu zirtirtu te in pe sela, hmasawnna thar a bik takin IT chungchangah pawh zirlai ten a tha zawng leh hlawkpui zawnga an hman theihnan zirtirtu te chu mahni in tuai hriam reng a ngaih thu a sawi bawk a ni.  

Education Minister chuan Mizo Naupangte chu state dang naupangte ai in an rilru a hniam bikloh thu sawiin, nun kawngdik leh nun hlawhtling an neih theihna tur chu Zirtirtu te kutah za a sawmriat (80%) zet a innghah thu a tarlang a, SSA Zirtirtu kalkhawm te chu State dang te tana entawntlak  Mizo Naupangte chherchhuak turin a fuih a ni.

He hun hi MSSTA Sub-hqrs Kolasib President Pu Vanlaltluanga’n a kaihruai a, report in a tarlan dan in tun dinhmunahah Mizoram chhunga District hrang hrang atangin SSA Teachers’ Association ah hian member 1606 an awm mek a. He hun ah hian  Pu Lalhmachhuana State Project Director, SSA Mission, District hrang hranga SSA Teachers’ Association hruaitute leh Kolasib Sub-Hqrs SSA Zirtirtute an tel tha hle a. Mizoram SSA Teachers’ Association ai awhin Pu Vanlaltluanga’n Sawrkar hnena an thil ngen leh phut te chu Education Minister kutah a hlan bawk a ni.