Siaha; the 2nd December, 2020: Vawiin chawhnu khan Pu Lalchhandama Ralte, Minister of State i/c Education.etc.chuan DIET(District Institute for Education and Training), DEO office leh Samagra Shiksha, DPC office te a tlawh.

DIET a tlawhnaah hian Minister leh Aizawla tanga amah tawiawmtute hi DIET Principal,Pu H.Lalfakzuala leh a thawhpui ten an lo dawngsawng a, DIET building leh a hmunhma te a fan zawhah DIET conference Hall-ah Minister leh DIET a thawk staff te hian inkawmhona hun an hmang a ni. DIET aiawhin Principal hian an dinhmun leh harsatna te hre chiang tura an hmunah ngei Minister in a rawn tlawh avanga lawmthu sawi pahin, an dinhmun leh harsatna hrang hrang te, an mamawh, hmachhawp leh hmalak mek te Minister hnenah hian a thlen a ni.

Minister pawhin thu sawiin, Education Minister a athut hnu kum 2 dawnah DIET,Siaha a rawn tlawh thei chu lawmawm a ti thu sawiin, Mizoram District 11 zingah 8 a tlawh tawh thu leh district zawng zawng tlawh chhuaha Education office Establishment te a mit ngeia hmupui vek a lo tum mek laiin, vannei thlak takin LADC inthlanna avangin a lokal a ngai a, remchangah a lak thu a sawi. Minister chuan DIET leh Education office dangte a hmun ngeia a tlawh duh chhan chu an harsatna leh mamawh hrang hrangte mit ngeia hmupuia, chung an harsatna te a rang thei ang bera sutkian theih dan a awm em tih hriat chian a duhthu a tarlang a ni.

Minister chuan DIET Lecturer te hnenah fuihna thu sawiin, Kan District leh Mizoram Education bulthut(elementary education) enkawltu zirtirtute , training petu in ni a, in mawhphurhna hi a sang em em a ni. Academic excellence lam chauh nilo, moral reformation lam pawh in infah hnem a ngai hle tawh a ni. Zirtirtu chuan an zirlai te chu, Lehkha thiamna chauh ni lo; kawngtina Khua leh tui tha mi ni tura an chherchhuah a ngai a. Chutiang tih theih khawpa tha in Zirtirtu te hi in lo Train a ngai a ni. DIET,Siaha hi Siaha district zirna bulthut siamthatna kawnga a khawlpui in nih hre reng u la, in hnathawh hi hlawhlakna tur fangah ngai lovin, rawngbawlna mission field-ah ngai turin ka chah che u a ni, a ti.

 Minister chuan Mizoram Education thanmawhbawk pakhat chu: Zirtirtu te hi Mizoram khawi hmunah pawh thawk thei tura lak an ni laiin, Khawpuiah vek awm an tum a. Posting leh Transfer han khawihin, han siksawih hlek i la, khawi khawi atangin emaw sawipuitu an lo awm vat zel mai thin a ni, tiin; Minister chuan

Siaha ka lo kal hma pawh hian in harsatna tam tak chu ka lo hriatsa a ni a, sutkian dan tur hi kawng dang dangin ka dap kual nasa a ni, tih pawh min hriatpui ka duh a ni, a ti bawk.

Minister hian DIET a tlawh zawhah DEO office leh Samagra Shiksha,DPC office tlawh leh in, Pu PC.Lalngaizuala DEO leh DPC ni bawk leh a staff ten lo dawngsawngin, office building leh hmunhma te inspection a neih zawhah DEO office-ah inkawmhona hun an hmang leh a ni. He inkawmhona hun hi DEO Pu Mangaia chuan kaihruaiin; DEO office leh DPC office mamawh hrang hrang leh harsatna an tawh hrang hrang te, tuna an dinhmun tlangpui te chu tawngkama Minister hnena a thlen bakah, chipchiar takin ziakin a thehlut bawk a ni. 

Minister chuan Kan Chief Minister Pu Zoramthanga hian Education hi a ngai pawimawh hle a, kum 2 vel Minister a ka awmchhung ringawt pawh hian zirtirtu sang chuang kan la tawh a, recruitment ti nasa ber dept kan ni hial awm e. Heti chung hian Zirtirtu indaih lohna hi a la nasa hle a, Siaha district hian Mizoram pumpuia zirtirtu indaihlohna hi in lo tuarna deuh bik a ni. Tunah pawh hian High School zirtirtu lak tur tihfel vek tawh Covid-19 avanga Recruitment kalpui hleihthei loh pawh a awm mek a. Heng te kan tifel theih hunah chuan Zirtirtu indaihlohna zualpui chu kan tifel thei kan beisei a ni, a ti.

Vawiin Minister in DIET, DEO&DPC office a tlawhnaah hian Prof.F.Lalnunmawia,MLA,Pu Lalhmachhuana,SPD,SSamagra Shiksha leh Jt.Director,School Education ni bawk te, Party hruaitu thenkhat ten Aizawl atangin an lo tawiawm a. Siaha district atang pawhin MDC, Party Hruaitu te leh Official ten an tawiawm bawk.

Prof.F.Lalnunmawia,MLA leh Pu Lalhmachhuana te pawhin vawiin programme-ah hian fuihna thu tha tak an sawi bawk a ni.