Hawnna inkhawmah hian Khuallian chuan thu sawiin Kolasib District in Mizoram Secondary School Games vawi 37 na a thleng thei hi thil lawmawm tak a nih rualin Mizoram school games neih tawha zirlai naupang infiam tura kalkhawm tam ber tum Kolasib ina a thleng chu thil chhinchhiah tlak tak ani a ti.
Minister chuan zirna leh infiamna (Education leh Sports) chu thil inkawp tlat then hran hleih theihloh a ni tiin Sports chu taksa insawizawina mai piah lamah rilru thlenga sawizawina hmanrua ani a, rilru leh taksa hriselna thlentu eizawnna atan pawh hmantlak a nih avangin Sorkar in Sports lamah nasa takin hma ala a, thalaite talent phochhuah nan Sawrkar in hma a lak pui zel tur thu a tarlang ani.
Pu Lalchhandama Ralte chuan Mizoram chhung Assembly Constituency hrang hranga chengte tana infiamna lama inelna tur Mizoram State Games chu Sawrkarin a vawikhat nan December thla a huaihawt a tum thu tarlangin infiamna lama talent nei tha te tana inphochhuahna hun remchang anih tur thu a sawi a, zirlai te tana huaihawt School games chu Pathian ina talent a pek te phochhuah nan hun remchangah la in theihtawp chhuaha thianghlim taka inel turin zirlai kalkhawm te a chah ani.
Khuallian chuan Mizoram Secondary School Games chu inthian thatna, inunauna leh inpumkhatna thlentu nise zirlai te tan hmasawnna rahbi thar thlentu ni turin duhsakna a hlan bawk a ni.
Mizoram Secondary School Games hi tum 35 Aizawl ah nghah ani tawh a, tum 36 na chu Thenzawl leh Champhai ah nghah niin tum 37 na hi Kolasib District ah nghah a ni a. Tun tumah hian District hrang hrang atangin zirlai 706 ten infiamna chi 6 heng Athletics, Boxing, Football, Hockey (girls), Judo, Volleyball (boys and girls) ah te an inel dawn a, October ni 25 thleng a awh dawn a ni.
Attachment
- Loading attachment...
