Pu Lalsawta, Education Minister chuan vawiin khan Cheng Vaibelchhe 9.51 senga Champhai Government College Building sak mek a tlawh.
Minister chuan Champhai College chu vawithum a tlawhna anih thu sawiin a tlawh leh hun chuan building tha tak sak mek chu puitlin tawh a nih ngei a beisei thu sawiin Champhai in College building tha tak, sum tam tak senga an sak theih nana sulsultu pawimawh tak Pu T.T.Zothansanga MLA hmalak pui naah lawmthu a sawi a. Champhai chu District khawpui pawimawh tak , thang duang tak anih avangin hmalak pui pawh a nuam a, a hmun leh a khawthleng in a zir avangin hun lo kal zel tur atan pawh fimkhur leh uluk taka Plansiam tur in a chah bawk.
Education Department chu lian tak anih avanga hnuhma pawh a mam sen loh thu leh mi mit tlun vek pawh a har thu sawiin Pu Lalsawta chuan Khawtinah sikul engemaw zat leh chhungtin deuhthaw a zirlai an awm avangin nakin zela thangthar leh Mizo hnam tana zirna her rem zel chu Sorkar tum dan anih thu a sawi a. Thlawhhma tha nei tura patling in a sur a sa hnuaia thosi leh vangvat a paltlang thin angin Zirna tha leh duhawm neih chhohna turin harsana hrang hrang te awm mah se, ram leh hnam leh zirna kawng tha neih chhohna tur atan chuan hmalak zel a tum thu sawiin hma an lak chhohna kawnga hlawhtlinna tam tak an neih tawh ah lawm thu sawiin School Uniforms, Zirlaibu te pawh kan sem zel anga, School building pawh thahnem tak kan sa zo tawh a, tun ah hian sak mek lai bakah sak belh zel turin hma kan la mek ani a ti..
Unemployment Problems sutkian nana Mizoram Chief Minister hova hmalak ngar ngar an tum dan sawiin Pu Lalsawta chuan zirlai thiam tak tak silo, passed ve tho te siamthat a ngaih thu leh Hindi pawh thiam nal tura hma an lak dan leh Zo tawng, English leh Hindi te zirlai ten thiam vek tura hma an lak dan te a sawi a ni.
Minister hian Tlangsam a Polytechnic building sak mek chu a hmunah kalin a tlawh chhuak vek a, chumi hnuah ah Zotlang a District Resource Centre (DRC) a tlawh leh nghal a ni. Minister hi heng hmun a fan kual naah te hian Pu T.T.Zothansanga, MLA Champhai North Bialtu, Champhai D.C. Pu Lalthangpuia Sailo leh khawtlang hruaituten an tawiawm tha hle a. Tlailamah Khawzawl a riak turin Champhai a chhuahsan a ni.
