Pu Lalsawta, Education Minister chu nimin khan Kolkata ah Oil and Natural Gas Commission (ONGC), Jawaharlal Nehru Road, Regional Office ah Pu D.P. Sahasrabudhe, Executive Director/Basin Manager hmu in Mizoram a ONGC hma lak mekna chungchang leh Mizo thalaite tana hna (job opportunities) a tam thei ang ber ngaihtuahsak tur leh chumi atana training neih hmasak ngai awm apiangte pawh a tih dan kawng kawhhmuh turin a ngen a. Executive Director hian Minister thu thlen te chu ngai pawimawhin North East India region lam bialtu Pu S.K. Jain, Basin Manager, Jorhar amite pawh a theih ang anga lo sawipui a tum tur thu a sawi.

Nimin vek chawhnu dar 3 ah Pu Bratya Basu, Minister, Higher Education, West Bengal chu a office, Bikash Bhavan ah hmu in Mizoram tana Engineering leh Medical zirna seat ngaihtuahpui turin a ngen a. Pu Basu hian theihtawp a lo ngaihtuahsak a tum thu a lo hrilh a ni.

Heng bakah hian West Bengal Minister hian sorkar bul tuma Civil Services exam hrang hrang atana coaching/training institute tha tak din tura hma a lak mek thu leh, a puitlin hunah chuan Mizoram atanga Mizo thalaite pawhin chhawr tangkai ve turin Mizoram Education Minister hi a hriattir nghal bawk a ni. Mizoram Advocate General Pu Biswajit Deb leh Kolkata Senior Liaison Officer Pu Talo Rosanga ten an tawiawm a ni.