Vawiin zing dar 10.00 khan Mizoram College Teachers’ Association (MCTA) chuan an pawl khawmpui lian vawi 34-na Synod Conference Centre-ah an hmang a; he hun hi Education Minister Pu Lalsawta chuan a hmanpui a ni.

Pu Lalsawta chuan MCTA member-te chu Mizoram hmasawnna tura a kila lung tangkai tak an nih thu hrilhin, “ College-a zirtirtute hian in zirlai chherchhuahte hmangin kan ram hmel in tidanglam thei a. Mizo-te hi India ramah hnam anga kan parchhuah theihna kawng khat chu zirna hi a nih avangin zirtirtute hian in naupangte thinlungah thiamna tak tak, eizawnna atana hmantlak leh an damchhung nun kaihruaitu tur chi tha in tuh a ngai a ni” a ti.

MCTA Gen. Conference hi President Pu Thanglura chuan a kaihruai a; chawhma inkhawmah hian Prof. R. Lalthantluanga, Vice-Chancellor, Mizoram University leh Prof. Margaret Ch. Zama, Director, IQAC, MZU ten Higher Education bihchianna leh hmathlir chungchangah leh Zirtirtute tana nundan tur inkaihhruaina lam hawia paper an buatsaihte zirho a; chawhnu lamah an pawl chhungkaw pawimawhte an rel ho bawk a ni. MCTA General Conference-ah hian Mizoram hmun hrang hrang atangin member 270 an kal a ni.