Education & Human Resources Development Minister Pu Lalsawtan vawiin khan SCERT Mizoram leh NCTE & Intel Technologies Pvt.Ltd. ten an buatsaih One Week Professional Development Training for Teacher Educators SCERT Auditorium ah a hawng.
Hawnna inkhawm tawite buatsaih hi Pu K.Riachho, Commissioner, Education & Human Resources Development in a kaihruai a. Khuallian Pu Lalsawta chuan hawnna thu sawiin tunlai thangtharte hi Technology khawvel ah kan cheng mek a. Hmasawnna engkim mai hi Technology thiamnaah a in nghet ta a. Chuvangin kan ram zirlai leh thalai thangchho mekte hi tunlai thiamna hmanga kan kaihhruai leh zirtir an ngai a. Zirlaite hi nakin lawka kan ram hmathlir leh nghahfakte an nih avangin helam hawi zawng a thiamna kan tuh hi tuna zirtirtute mawh lian tak a ni a ti a. Tuna NCTE & Intel Technologies Pvt.Ltd. te leh SCERT te tangrual a hetiang Training hun tha tak an buatsaih thei hi a lawmawm tak zet a; hmasawnna rahbi tharah min hlan chhoh ngei ka beisei a ni a ti.

Pu Sawta chuan Mizoramah Education Department chu siamthat ngai hle in kan hria a; chuvang chuan Education Reform Commission hial dinin hmalak tum mek a ni a; nakin lawkah chuan zirna pumpui bakah a thawktute hamthatna thlengin kan siamthat kan beisei a ni a ti. Mizoram Education Service Rules pawh mumal taka siam tum a ni a ti.

NCTE & Intel.Technologies lam aiawhin Head of the Corporate Affairs Pi Mukhergy in Training Programme kam keuna thu a sawi a;  Pi Sangthanmawii, Joint Director SCERT in lawmthu a sawi a. He hun hi Pi Malsawmthangi, Director, Education Department pawhin a hmanpui a ni.