Mizoram a zirna in hma a sawn theihdan tur chungchangah School Education Department buatsaihin inrawnkhawmna hun DEO leh SDEO te tan vawiin khan an department conference hall-ah inkhawm pawimawh tak buatsaih a ni a. Hemi chungchang hi ngai pawimawhin Mizoram Larsap Lt.Gen.(Rtd.) M.M.Lakhera, PVSM, AVSM, VSM leh School Education Minister Pu Lalsawta ten an hmanpui a ni.

 

 

School Education Secretary Pu K.Riachho, IAS kaihhruai ah hian thu sawiin Mizoram Larsap chuan Mizoram in zirna lamah hmasawnna leh sukthlek thar a neih loh chuan he state ah hian hmasawnna tluantling a thleng tak tak ngai lovang a ti a. Vawiina kan zirlai naupang tete te atanga tan hian zirna diktak hmantlak leh mi hlawhtling chherchhuak tura tan kan lak tlan a pawimawh takzet tawh a ni a ti. Governor chuan amah ngei pawh hi a pa te atang renga zirna ngaisang, sipaia a hun tha zawng zawng a hman lai pawha zirna lam tuipui thin a nih dan te sawiin Army Welfare Fund enkawltu a nih lai pawhin sipai enkawl school hrang hrang India ram pumah an din dante a sawi chhuak a. Mizoram a zirna in chak lehzuala hma a sawn theihna tura Education Reforms Commission din pawh chu a thlawp tlat thu leh he Commission in hna a thawh tak tak dawn chuan Education Department-a officers te bawk hi a meizang hlaptu leh a tihlawhtling theitu tur an ni ang a ti a. Chuvangin zirna kawng leh a kaihhnawih thil reng rengah sukthlek thar neia tan la sauh sauh turin DEO leh SDEO te chu a sawm a. Anmahni hnathawh service chungchang emaw an pawl hmakhua lam ngawt ngaihtuah lova an bial huamchhung theuhva zirna in leh zirtirtute hmasawnna tur ngai pawimawh hmasa fo turin a hrilh a, tun aia tam endik hna (Inspection) nei turin a hrilh a ni.

Education Minister Pu Lalsawta pawhin Education Reforms Commission din tharin hna an tan tak tak hma a department chhunga inbuatsaihna tha tak lo neih hmasak chu tula hriat a nih avangin hetianga Education officers te nen dawhkan khat kil a inpawh taka thil awm dan sawi tlan chu rawt a nih thu a sawi.

Vawiin inkhawm ah hian School Education Director hovin a hnuaia officers pawimawh te nen DEO 8, SDEO 19 te chuan inrawn khawmna hun thawl tak an hmang zuia. Inpawh takin Minister te nen nilengin he hun hi hman a ni.