Vawiin khan Environment & Forests Department chuan kum 2013 atana inhlantharna hun E&F Conference Hall, Tuikhuahtlang-ah an hmang a, he hun hi E&F Minister Pu H.Rohluna’n a hmanpui a ni.

Minister Pu H.Rohluna chuan fuihna thu sawiin E&F Department chu Mizoram hmun hrang hranga dapa inzarpharh a ni nachungin a tak taka thawktu indaihlo ber pawl a ni avangin hnathawkte chu thahnemngaia, neitu rilru pua hna thawh theuh a tul a ni, a ti. Thawh tur hmachhawp hrang hrang atana sorkar laipuiin sum a ruahman mekte pawh hi a taka hmuh hunah chuan Zoram mipuite changkanna atana hman ngei tum tur a ni, a ti.

Vawiin inhlantharna hunah hian Forest Extension Division-in an buatsaih Aizawl Sahuana thing leh thlai dang awmte chanchin ziakna lehkhabu “Trees & Other Plants of Aizawl Zoological Park” chu Minister hian a tlangzarh nghal a ni. He lehkhabuah hian thingkung chi 150 chanchin leh thlalak tarlan a ni a, hetianga Mizo tawng ngeia thingkung chanchin buatsaih a ni thei hi Sahuan tlawhtute bakah zirna sang zir ve thei lo, ramngaw humhalh chungchanga tui si te mamawh a phuhruk ngei a beisei thu leh mipui mimir tan inzirna tha tak a nih a beisei thu Pu Rohluna chuan a sawi a ni.

He hun hi Pu Rosiama Vanchhong, Addl. PCCF-in kaihruaiin ramkang ven chungchanga department-in Doordarshan Kendra, All India Radio leh nitin chanchinbu kaltlanga mipuite sirtirna neih an tum dan te, District Level leh Forest Division level bakah Village Level thlenga ramkang veng tura mipuite zirtirna an pek dan leh Seminar hmanga zirtirna an pek dan a sawi bawk. PCCF thar Pu J.L.Singh pawhin thu a sawi bawk.