713/2024-2025

Aizawl, 07.06.2024: Vawiin khan Environment, Forest & Climate Change Minister Pu Lalthansanga chuan I&PR Auditorium-a Mizoram Environment & Forest Consultative Forum (MEFCOF) General Assembly buatsaih chu khuallian niin a hmanpui.

Khuallian chuan ram leh mipui nunkhawchhuahna atan leh hmasawn zelna atan pawha ramngaw leh nungcha humhalh a pawimawh thu a sawi a. Hemi kawnga MEFCOF in hun rei tak atanga rim tak leh mahni sum senga ramngaw humhalhna anlo buatsaih chu fakawm a ti a, “ram tana rohlu an chher chhuak takzet a ni” a ti. Minister chuan hun lo la kal zel turah theihtawp chhuah zui turin kalkhawmte chu a sawm a, Sorkar nena thawhhona tha nei zel tur pawhin a sawm bawk.

Minister khian MEFCOF Lawmman dawngtute hnenah Citation leh pawisa fai a sem nghal a ni. Lawmman leh Chawimawina dawngtute chu hetiang hi a ni:

A) MEFCOF hmalaknaa ramngaw leh nungcha humhalhna hmun (Ram Reserve) Zotheihuan 170 awm tawh zingah enkawl tha ber khaw 7 hnenah lawmman leh tangka fai hlan an ni a. Chungte chu:

1. Lalluaia Zotheihuan, Reiek hnenah lawmman Pakhatna, Citation leh Rs. 30,000 hlan an ni
2. Liana Zotheihuan, Neihdawn hnenah lawmman Pahnihna, Citation leh Rs. 20,000 hlan an ni
3. Kanghmun Zotheihuan hnenah lawmman Pahnihna Citation leh Rs 10,000 hlan a ni.

Consulation Prize lawmman pekte:

(a) Ramlaitui/Dilmual/Melpuimual Zotheihuan, Ruantlang
(b) Rozinga (L) Memorial Zotheihuan, Darlung
(c) Khawlailung Zotheihuan, Khawlailung
(d) Milupuk Zotheihuan, Mampui

B) MEFCOF hian Mizo zinga Environmentalist zinga entawn tlak tak mi 4 hnenah chawimawina thuziak an hlan bawk a, chungte chu;

1. Pi Bawihchhingpuii, Zotheihuan bul tantu
2. Pu Romalsawma Hmar (Roma), Environmentalist
3. Tv. Zira PC, Environmentalist
4. Pi Vanramchhuangi (Ruatfela Nu), Environmentalist

Vawiin MEFCOF khawmpuiah hian District hrang hranga Sub-Headquarters leh Environmental Pawl hrang hrangte ASEP, BIOCONE, Save the Riparian, MENCO, STAM, MSDF, GMN, Mizoram First bakah ramngaw leh nungcha humhalh duhtu mi 80 chuang kal khawmin intiamtharna hun an nei bawk.

Kum 2024-2026 chhung atana MEFCOF hruaitu tur thlanna neih a ni nghal a. Heng mite hi thlanchhuah an ni:

President: Pu VL Bela, Electric Veng
Vice President: Pu Vanlalsawma, Electric Veng & Prof. Zokaitluangi, Chanmari
General Secretary: Upa C.Lalhluna, Bethlehem Veng
Secretary: Pu H.Chhawntluanga, Bawngkawn; Pu Joseph Thansanga, Electric Veng & Prof. Paul Songate, Dinthar Veng
Treasurer: Pu Aloysius Vanlalduha, Zohnuai
Finance Secretary: Pu R.Lalthakima, Ramhlun North