1472/2022-2023

Aizawl, the 5th August, 2022: Mizoram hmasawnna hrang hrang buaipuia New Delhi-a cham mek EF&CC Minister, Pu T.J. Lalnuntluanga chuan nimin chawhnu khan Pi Leena Nandan, IAS, Secretary (EF&CC) leh Pu C.P. Goyal, IFS, Director General & Special Secretary of Forests-te chu Jor Bagh, New Delhi-ah a hmu a, Mizorama Carbon trading/ Green Credit chungchang leh Forest Department kaihhnawiha thil pawimawhte a sawipui.

EF&CC Minister, Pu T.J. Lalnuntluanga chuan  Sawrkar laipui Forest Department hotu liante hnenah hian Carbon Trading/Green Credit chungchang  awmze nei leh mumal taka kalpui dan tur leh Tribal State-a hmalak dan turte a sawipui a. Hemi chungchangah hian Central lam pawhin inkaihhruaina (guideline) mumal tak an la neih loh avangin India ram pum huapa inrawnkhawmna zau zawk neih a tul thu an sawiho a ni.

Hemi rual hian Wildlife Sanctuary leh Tiger Reserve kan neihte atana hnathawhna tur, APO State sawrkarin a thehluh thin chu a hun taka hna thawh a nih theihna tur leh thawktuten a hun taka hlawh an lak theihna tura hmalakpui  turin a ngen bawk a. EF&CC Minister hian amah ngei pawhin henga thawktute hi ruahsur leh zan khawthim hnuaiah tlawhin, an dinhmunte a hriatpui thu Official-te hi a hrilh a. Sanctuary leh Wildlife-a thawktute hlawh a hun taka pek a nih theihna tura hma lakpui turin a ngen a ni.

Environment Forest & Climate Change Minister, Pu T.J. Lalnuntluanga chuan National Park leh Wildlife Sanctuary-te hi a ram zau zawng ang zela chhutin India ram pumah 5.3% a nih laiin Mizoramah chuan 9.48 % a ni, a ti a. Za zela chhutin India ram pum chawhrual ai pawha a cover area a zau avangin Mizoram chu Special Incentive (a bika duhsakna) pe turin a ngen bawk a ni.

Pu T.J. Lalnuntluanga chuan Mizoramah Nature Learning Center (NLC) kan la neih loh thu hrilhin, India rama Forest cover/Green area zau zawng za zela chhuta nei sang kan nih avang hian kan mamawhna pawh a sang a ni tiin, NLC din tura dilna thehluh chu pawmpuia sanction pe turin a ngen bawk.

Central Forest Department hotu liante chuan EF&CC Minister ngennate hi lo enzuia theihtawp chhuaha hma an lo lakpui tur thu Minister hi an hrilh a ni.

EF&CC Department Minister hi Pu Jitendra Kumar, IFS, Principal Secretary & PCCF, Pu Pee Lee Ete, IFS, Conservator of Forest (Eastern Circle), EF&CC Department leh Pu Thomas Lalrammawia, MJS, Deputy Secretary, Law & Judicial Department ten an tawiawm a ni.