Vawiin chawhma khan Chhinga Veng Community Hall ah Pu Lalrinmawia Ralte, Minister i/c Environment, Forest & Climate Change, etc., chuan 36th P.S. Dahrawka Memorial Chess Championship - 2016 leh Mizoram Chess Association(MCA) rating tournament ni bawk chu a hawng.

Chess Tournament hawngtu Pu Lalrinmawia Ralte, EF&CC Minister chuan thluak sawizawina game leh rilru tihchakna atana a that zia mithiam te pawh in an zirchian hnua an sawi thin a nih avangin Mizoram pum huap ang pawhin chess khelh chu thil intihhmuh chi a ni a ti a. Zirlai naupang te hnenah chess game tihlar a nih theihnan Mizoram Chess Association in ngaihtuahna seng se sawrkarah pawh rawtna te thlen thei se a hlawkthlak hle in a rin thu Minister chuan a sawi a. Mizo chess player te chu an game ah hmasawn tuma India ram leh international level thleng pawha hnuhma lian zawk neih tuma tan la turin a chah a ni.

36th P.S. Dahrawka Memorial Chess Championship - 2016 hawnna hi Pu Rochunga Ralte, Former MLA, Mizoram Chess Association President leh Joint Secretary, AICF in a kaihruai a. MCA atangin report ngaihthlakna neih a nih bakah he tournament hmingtumtu chhungkaw hnen atanga thusawi ngaihthlakna hun pawh neih a ni.