No.7496/2020-2021

Environment, Forest & Climate Change Minister Pu T.J. Lalnuntluanga chuan vawiin khan Champhai khawpui chhunga zirna in pahnih, Govt. GM Higher Secondary School, Vengsang leh Govt. Primary School-IV, Kanan Veng-te tlawhin School mamawh leh harsatnate a enfiah. DM&R kaltlanga hmanlakna tur Ruantlang Lersia Field chhaka lei tlahniam leh Champhai Kanan Venga lei tlahniamte Official-te nen an enfiah bawk.

Govt. GM Higher Secondary School a tlawhnaah thusawiin, Pu T.J. Lalnuntluanga chuan ram hmasawnna leh than zelna tura inghahna lungphum pawimawh tak chu ngaihtuahna leh rilru sukthlek dik neih anih thu sawiin, hei hian hnam hmangaihna leh vawnhim duhna thinlung a pe thei dawn a ni, a ti. Zirlai naupangte chu nakin lawka nu leh pa, ram hruaitu leh kaihruaitu tur an nih avangin mahni kutke a din tuma intodelh tum tlat turin a fuih a. Kut tling lova sum lakluh leh eiruknate do tlat angaih thu sawiin, awlsam taka thil neih aiin harsa taka thawhrimna leh taimakna kaltlanga neih tum thin turin a chah bawk.

Minister hian Govt. Primary School-IV, Kanan Veng pawh tlawhin Comprehensive School-a siam a nih theih dan turte a hmunah tlawhin a enfiah a. Zirna in a tlawhnaah hian thawktute nen inkawmna hun an hmanga, a hnena harsatna leh mamawh an thlente a tul anga enzuia bawhzui a tum thu a hrilh a ni.

Vawiin vek khan Disaster Management & Rehabilitation kaltlanga hmalakna tur Ruantlang Lersia Field bula lei che leh hmalak tawh dante enfiah a ni a, he lai hmuna lei che hi kum 1990 chho bawr vel atanga intan, kum 2000 leh 2013 vel atanga che nasa leh a, 2019 June thla vel atanga rawn che nasa zuala chhinchhiah a ni. Enfiah leh dang Champhai Kanan Venga lei che hi kum 2013 August thla vel atanga che tan niin, lei chein a nghawng leh hmalak tawhnate  enfiah niin, a che zel tur venna tura hmalak dan turte sawiho anih hnuah leilung chanchin zirmite ruaia zirchianna famkim zawk neih hnuah hmalak nise tih a ni.

Environment, Forest & Climate Change Minister Pu T.J. Lalnuntluanga hi Pi Maria C.T. Zuali DC, Pu Rex Zarzoliana Vanchhawng SP, Pu R.Lalnghakliana PD, DRDA, Pu TT Laltanpuia DEO, Pu Eddie C.Zothansanga EE, PWD, Official dangte leh khawtlang hruaitu te’n an tawiawm  a ni.